Nuussuarmi toqungasumik nassaartoqarpoq
Eqqumiitsumik pissuteqarunartumik toqusimasoq pillugu suliaq nutaaq, Nuummi politiit maannakkorpiaq ulapputigaat.
Unnuaq politiinut saaffiginnissutigineqarpoq, Nuummi Nuussuarmi arnaq toqungasoq nanineqarsimasoq.
Vicepolitimesteri Bjørn Bay oqarpoq arnaq toqungasoq nanineqartoq, 40-t missaannik ukioqartoq.
Inissiaq toqungasup nanineqarfia misissorneqassammat matugallarneqarsimavoq, Naalagaaffiullu politiivi pinerluttulerinermik suliaqartartut misissuinissami ikiortiserineqarput, aammalu nakorsaq toqusunik misissuisartoq aggersarneqarsimalluni.
Toqutsisimanermut tunngasoq alla, Naalagaaffiup politiivisa aamma misissugassaraat. Tassani arnaq 58-inik ukiulik, sapaatip-akunnerani kingullermi inissiamini inigisamini toqungasoq aamma nanineqarpoq.
Nakorsap toqusunik misissuisartup arnap toqqutigisaa suunersoq misissorpaa, tassungalu tunngatillugu angut pasisaq, sapaatit akunnerini sisamani tigummigallagassanngortinneqarsimavoq.
Arnat taakkua marluk toqunerisa imminnut attuumassuteqarnissaat ilimananngitsoq, Bjørn Bay oqarpoq.
