Nuussuarmi qanittukkut oqaluffiliortoqassanngilaq

Siumut sinnerlugu Inatsisartunut ilaasortaq Jens Immanuelsen, Nuup illoqarfiata ilaani Nuussuarmi nutaamik oqaluffiliortoqarnissaanut pilersaarutit pillugit § 37 naapertorlugu ilageeqarnermut naalakkersuisumut Nick Nielsenimut apeqquteqarpoq. Akissutaanilu paasinarsivoq Nuussuarmi najugaqartut namminerisaminnik oqaluffittaarnissaat imaaliallaannaq pisinnaassanngitsoq.
januaarip 28-at 2014 06:34

Nick Nielsen allappoq oqaluffimmik sananissamut atatillugu pilersaarusiornissamut 2007-mi aningaasanut inatsimmi 1 mio. koruunit aningaasaliisoqarsimasoq, pilersaarusiornerli suli naammassineqanngitsoq aningaasat taakku atorneqareermata suliaq unissimasoq.

-Aningaasaliissutaasut saniatigut pilersaarusiornermut aningaasat amerlanerusut pisariaqartinneqartut paasineqarpoq. Uagutsinnut killiliussaasut iluini kissaatigisanik tulleriissaarinerup malitsigisaanik oqaluffimmik nutaamik nappaanissamut pilersaarusiornermut aningaasaliissutit ilaneqanngillat, Nick Nielsen akissuteqalruni taama allappoq.

Nuussuarmi oqaluffittaassap siunissaa nalunarpoq. Nick Nielsenili allappoq oqaluffik pilersaarutaasoq salliutinneqartoq, aningaasanullu inatsisissap suliarinerani isumaliuutigisanut Naalakkersuisut ilaatikkaat. Nuussuarmili najuaqartut apeqquteqartullu Nick Nielsenip Jens immanuelsenimut akissuteqarneratigut nutaanik paasaqarpallaanngillat.

Nick Nielsen naggasiutigalugu allappoq kristumiutut upperisatta ingerlannerani pitsaanerpaamik atugassaqartitsinissamik apeqquteqartup isumaa Naalakkersuisut isumaqatigigaat, Nuussuarmili qaqugu oqaluffimmik sanasoqassanersoq ullulissallugu maanna siusippallaartoq'.