Nuussuaq oqaluffittaassaaq

Nunaqarfiup Nuussuup Upernaviup eqqaaniittup piffissami qaninnerusumi oqaluffittaarnissaa naatsorsuutigineqarsinnaalerpoq. Oqaluffiup 2008-mi apriilimili ikuallattup taartissaa 2011-mi naammassissaaq.
Allattoq Elisa Isaksen
februaarip 04-at 2010 07:21

Inatsisartunut ilaasortap Kristian Jeremiassenip paragraf 36 najoqqutaralugu

apeqqutigaa, Nuussuup oqaluffia ikuallassimasoq taarserlugu qaqugu oqaluffiliortoqassanersoq aamma oqaluffiup 2008-mi apriilimili ikuallattup taartissaanik oqaluffiliorluni sooq suli aallartittoqarsimannginnersoq.

Mimi Karlsenip akissummini oqaatigaa, oqaluffiliorneq aallartinneqangajalersoq, Nuussuarmiullu 2011-mi oqaluffittaaqqinnissartik naatsorsuutigisinnaagaat.

Mimi Karlsenip oqaatigaa, oqaluffiliornissaq sillimmasiisarfimmik suleqateqarneq nutaamillu oqaluffiliornissap akuerineqarnissaa kinguarsaataasimasut. Taamaalilluni aatsaat 2009-mi aasakkut sanasussarsiortoqartoq oqaluffiliornissamullu akuersissut ukiarmi aatsaat tunniunneqartoq.

Nuussuaq avannarpasissumiimmat ukiukkut sikuusarnera aamma ajornartorsiutaavoq. Taamaattumik upernaaru Nuussuaq immakkut tikinneqarsinnaalerpat oqaluffiliorneq aallartinneqarsinnaassasoq, ilageeqarnermut naalakkersuisoq Mimi Karlsen allappoq.