Meeqqerivik Umiap aneersuartarfiata aappaa, una assimiittoq, ernguttoqartillugu aneerfigineqarneq ajorpoq. Aningaasarsiffimmi taamatut pisoqarnerusartoq meeqqerivimmi ikiortip oqaatigaa.

Nuussuami ernguttartunut meeqqerivik naleqqussartariaqartartoq

Nuup ilaani Nuussuarmi Meeqqerivik Umiami meeqqat aneernissaraluat ilaatigut pinngitsoortinneqartariaqartarpoq, meeqqeriviummi eqqaani ernguttut eqqissiviilliortitsisinnaasarmata. 

Aningaasarsiffiup nalaani Nuup ulaani Nuussuarmi ernguttut takussaalertarput. Meeqqallu toqqissisimatinniarlugit Meeqqerivik Umiami aneernissaraluaq ilaatigut taamaatiinnarneqartartoq sulisup KNR-imut oqaluttuaraat.
- Aningaasarfimmi ersarinnersaasarpoq, ulluinnarsiutaarujunngikkaluarpoq, Meeqqerivik Umiami ukiuni qulini ikiortaasoq, Tina Løvstrøm Møller oqarpoq.
Nuup ilaani Nuussuup eqqaani silami ernguttut eqqissiviilliortitsisinnaasarnerat qatsullugu innuttaasut atsiornernik katersileruttorput. Taakku Pisiffimmi imigassaarniartoqartarunnaarnissaa  anguniarlugu atsiornerit 580-it maannamut katersoreersimalerpaat.
Meeqqerivik Umiami aneersuartarfiit immikkoortut marluupput, aneersuartarfiulli aappaa atorneqarneq ajorpoq qanitaani ernguttoqartarmat.
- Aningaasarsiffimmi imaluunniit tallimanngornermi ernguttoqartillugu takanna atorneqarneq ajorpoq, atortinnaveersaartarparput. Ilaanni nilliasoqarlunilu pilertarami takanani.

AAMMA ATUARUK Har fået nok af fulderikker: Samler underskrifter for at stoppe salg af alkohol

MIO: Ernguffiusumut meeqqat illersorneqartussaapput

KNR-imiillu ataasinngornerup ualigaa ernguffiusartoq alakkarparput:
- Matuniarsiuk! Uagununa manna aneertarfipput, Nuussuup eqqaanut apuussimatsiartugut putumasut ilaat meeqqerivimmut tikkuaatigaluni oqarpoq.

Ernguttoqartillugulu taama pissusilersortut Pisiffiup eqqaani takussaasarput.
- Suangasartoqaleraangat eqquttarpagut allamulluunniit pisilaarlugit kisianni eqqunnerusarpagut, taamaattoqakulanngikkaluarpoq, Meeqqerivimmi ikiorti Tina Løvstrøm Møller oqarpoq.
Meeqqat ornittagaat ernguffiusunut killilersorneqarnerisigut ajornartorsiutit taamaattut iliuuseqarfigineqarsinnaasut Meeqqat Illersuisuat isumaqarpoq.
- Assersuutigalugu meeqqeriviup silataani, atuarfiup silataani ernguffiunerit tamakkua killilersorneqarsinnaapput aaliangiinikkut "maani pissanngillat". Maaneqqissaaq taamatut pisoqassanngilaq meeqqat ornittagaasa eqqaanni, Meeqqat illersuisuat, Aviâja Egede Lynge taama oqarpoq.
Atsiornerit Pisiffiup qullersaqarfianut aggustip aallaqqaataani tunniunneqareerpata qullersaqarfik aatsaat oqaaseqarumavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat