Nuup Umiarsualivittaassaa apersuutigeqqinneqarpoq

Nuup umiarsualivittaassaa oqallisaajuarsinnarpoq. Naalakkersuisuusimasup nalaanni umiarsualivittaassap 2016-imi naammassineqarsimanissaa qularutigineqanngilaq. Attaveqarnermulli naalakkersuisup Steen Lyngep naalakkersuisutut siulimisulli erseqqitsigisumik oqarumanngilaq, aamma illoqarfiit pingaarnersaata 2016-imi nutaamik umiarsualiveqalernissaa neriorsuutigiumanngilaa.
maajip 21-at 2013 09:06

Nunatsinni politikeritoqqat ilaata Per Berthelsenip (S) umiarsualivittaassap siunissaa pillugu § 37 naapertorlugu Steen Lyngemut tamanna pissutigerpiarlugu apeqquteqaateqarpoq.

Nuummi umiarsualivittaassamut tunngatillugu aalajangiinissamut toqqammavissamut pioreersumut sunniuteqarsinnaasunik paasissutissanik nutaanik saqqummertoqarsimanersoq Berthelsenip paaserusuppaa. Nuup umiarsualiviata naammassisaqarsinnaassutsikkut ajornartorsiorfiunerata iluarsiniarneqarnissaanut taamaaliornikkullu Nunarput tamakkerlugu illoqarfinnut nunaqarfinnullu nioqqutissanik pilersuinerup qulakkeerneqarnissaanut qanoq eqqarsaateqarnersut Politikerip Siumumeersup aamma paaserusuppaa.

- Nuummi umiarsualivimmik allilerinissap sanaartugassanik nutaanik ataatsimoortumik tulleriiaarinissamut ilaanissaa kiisalu piginnittuunermut aningaasalersuinermullu tunngasut misissoqqinneqassasut Peqqissutsimut Attaveqaqatigiinnermullu Naalakkersuisup Steen Lyngep oqaatigaa. Taamatut oqariartuuteqarneq tulleriiaarinermik kiisalu umiarsualiviup kinguartinneqarnissaanik nipeqarpoq, tamannalu inuiaqatigiinnut annertuumik kinguneqaateqassaaq. Ukiorpassuit ingerlaneranni misissuinernik sukumiisunik Nuummi umiarsualiviup allilerneqarnissaata pisariaqassusianik sukumiisumik takutitsisunik suliaqartoqartarpoq. Piginnittuunermut aningaasalersuinissamullu pissutsit misissorluarneqareerput, taamaalillunilumi aalajangernissamut toqqammavissat naammattut pigineqareerput, Per Berthelsen oqarpoq.