Nuummi umiarsualivik attoqilliuuffiuvoq aserfakkiartorneralu ataavartumik aserfallatsaaliinermut malinnaasinnaajunnaariartorluni. Umiarsualiviup inissaqarpiannginnera inunnut umiarsualivimmi sulisunut aqqusaartunullu ulorianarsigaluttuinnarpoq. Umiarsualiviup ullutsinnut naleqqussarnissaa pisariaqalerluinnalersoq nunatsinni umiarsualivinnut tamanut pisortaaneq John Rasmussen oqarpoq:
- Maani umiarsualivimmi ajornartorsiutinngorsimasut marluupput, siullermik umiarsualivik ingerlatsivinnit assigiinngitsunit katullugu atorneqarpoq. Pisoqartaa biilit assartuinernut atortut allallu, soorlu trucket, nammineq pigisanik biilertut, taxat lasbiilersuillu tamarmik aqqutigaat, kiisalu talittarfia kilisaatinut atorneqarpoq talikkaangata usingiaaneq ingerlanneqartarluni. Isuatungaa sinersortaatit talittarfigaat, sinersortaatillu inunnik ulikaartut talikkaangata qanoq ulorianarsisartiginera takorloorneqarsinnaavoq, John Rasmussen nunatsinni umiarsualiviit pisortaanerat oqarpoq. Aamma oqarpoq qasseeriarluni soorlu meeqqerivimmiut umiarsualivimmut takornariartut takusarini, assullu ulorianartarmat mianersoqqusivoq.
Umiarsuliviup pisoqartaata tattorliuuffiunera pissutigalugu napparutit truckertoqarneranik ilisarnaasersukkat napparneqarsimapput, annertunerusumilli allatut iliuuseqarsinnaanatik John Rasmussen oqarpoq. Nuup umiarsualivianiippoq umiarsuarnut imarpikkoorutinut aamma talittarfik containereqarfillu. Tamanna ajornartorsiutit aapparigaat John Rasmussen oqarpoq.
Angissuseq naammattoq eqqarsaatigissagaanni containereqarfik naleqqukkunnaariartorpoq. Inissakilliorneq pissutigalugu containererpassuit qaleriaarneqartarput, tigusisussallu naapertorlugit illuartiterrinersuaq nuutsitseqattaarinersuarlu piffisaajaataangaatsiartarput. Tamanna pillugu umiarsuarnik tikittunik usingiaaniarnerit usilersuiniarnerillu piniaasaartarput, taamaaligaangat illoqarfimmi niuertarfiit nioqqutissanut utaqqinerusalerput, tamannalu aningaasanik aamma naleqartoq John Rasmussen oqarpoq.
Sillimanissaq pillugu umiarsualivik allilerneqartariaqaraluarpoq, isumaqarpungalu timmisartoqarfinnik talliliinerit sanaartornerillu ilutigalugit umiarsualiviit aamma malinnaatinneqartariaqaraluartut angallassinikkut assartuussinikkullu ataqatigiimmata, John Rasmussen oqarpoq.
Nuup umiarsualiviani containereqarfiup naqqa manissuinnaajunnaarsimavoq ukiukkut nuna qerisarlunilu assakkut aakkaangat toqqavik equjartortarmat, containereqarfiup ilaa atorsinnaajunnaarsimavoq toqqavik mallortitersimammat ilaatigut meteri angullugu ititigisunik.