Nalunaarusiaq nutaaq saqqummeqqammersoq takutippaa Nuummi silaannaap mingutsinneqarnera annikitsuinnaasoq, suliffeqarfiit assigiinngitsut mingutsitsinerat eqqaassanngikkaanni, mingutsitsinerlu Ameerikkap avannarliup nunataaneersoq eqqaassanngikkaanni. Danmarkip avatangiisinut misissuisoqarfiata, DMU-p nalunaarusiaanni tamanna atuarneqarsinnaavoq.
Nuummi mingutsitsineq ataatsimut isigalugu annikitsuinnaasoq, mingutsitsinerlu Ameerikkap avannarliup nunataaneersoq annikitsuinnaasoq takutippaa mingutsisoqarnerannik nakkutilliinerup Nuummiit Station Nordimut nuunneqartariaqarnera. Taamaaliornikkut mingutsitsineq Europameersoq Asiaminngaanneersorlu sukumiinerusumik nakkutigineqalersinnaassasoq, DMU-p nalunaarusiaanni atuarneqarsinnaavoq.