Nuup saava uuliamik maqisoorfigineqarpoq
Qapiusarfiusaami inissiarsuarni najugallit, immami uuliamik mingutsitsisoqartoq najukkaminnit takusinnaasimavaat, taamaattumillu politiit misissuillutik aallartillutik.
Nuummi politiiniit oqaatigineqarpoq, misissuinikkut lastbilinit annanik eqqaassutinit mingutsitsisoqarsimasoq paasineqartoq.
Lastbilit annanik imaarsissutaanermik saniatigut, umiarsualivimmi kilisaatit angallatillu allat uuliaarluernerinik katersissutitut atorneqartarput. Lastbilit uuliakumik Nuummi ikuallaaviliaassereernerisa kingornagut milluaassutit iluamik salinneqarsimanngillat, taamalu lastbilit tankianni uuliakoq sinneqarsimalluni.
Taamaalilluni lastbili annanik igitsiartorami uuliakoq ilanngullugu annanik eqqaavimmut igissimavaa, uuliakorlu tamanna Saqqarliit eqqaani immami takuneqarsinnaasimavoq.
Inuilli ernummatissaqanngitsut Nuummi politiinit oqaatigineqarpoq. Matumanimi pineqarmat uulia annertunngitsoq, taannalu ullormi ataatsimi marlunniluunniit aalannguuttussatut naatsorsuutigineqarpoq.
Tamatumunnga peqatigitillugu lastbilimik piginnittut, lastbilit uuliakumik assartuinermut atoreernerisigut tankiminnik saliilluartaqqullugit qinnuigineqarput.
