Nuup Reykjavikillu akornanni timmisartuussisarnerit ingerlalluarput
Islandimi Reykjavikip Nuullu akornanni Air Icelandip timmisartuussisarnera iluatsilluarsimavoq iluarisimaarneqarlunilu, timmisartuussisarnerillu aappaagu amerlineqarnissaat sivitsorneqarnissaallu ilimagineqarpoq.
Timmisartuutileqatigiiffimmit aallartitat Nuummi tikeraareersullu, Islandimi timmisartuutileqatigiiffiup ilaasoqarnermut pisortaa, Gróa Ásgeirsdóttir, taama oqarpoq.
- Nuummut timmisartuussisarnerput assorsuaq iluarineqarpoq, timmisartutsinni ilaasorineqarsinnaasut 65-70 procentinik ilaasoqartuaannnarsimavugut. Taamaammat aappaagu annertunerusumik timmisartuussisarnissarput siunniupparput, ilaasoqarnermut pisortaq oqarpoq.
Nuummi Takornariaqartitsivimmi, Nuuk Tourismimi pisortap, Flemming Nicolaisenip, kaammattuinera tunngavigalugu, Air Icelandip timmisartuussisarnera ukioq mannamut naleqqiullugu qaammatinik marlunnik sivitsorneqarnissaa timmisartuutileqatigiiffiup eqqarsaatigaa maajip qaammaataanit septembarip qaammataata tungaanut. Sunngiffimminni aalisartartut tammajuitsussarsiorlutillu piniartartut kajungilersinniarnissaat Air Icelndip anguniarniarpaa, sunngiffimminnimi aalisartartut tammajuitsussarsiorlutillu piniartartut Nuuk Tourismip suleqatigineratigut hotelini illuaqqanilu inissarsissunneqartassapput.
