Nuup qeqqani annersaalluni ujajaariaraluartoq tigusarineqarpoq
Nuup qeqqani angut arfininngormat aggustip ulluisa 22-anni ualilluinnartoq arfinermut qiteqqutilersoq angutip allap saassuteriarlugu ujajaaffigeriaraluarpaa.
Allattoq Najaaraq Egede
aggustip 24-at 2009 14:10
Angut saassussisoq 20-t 30-llu akornanni ukioqartoq, saassutami aningaasaatai allallu kaasarfimmiui tilleriaraluarpai.
Politiinit tigusaavoq, suliallu paasiniaaffigineqarnerani maanna tigummigallarneqarluni.
Angut ujajaaniaq, annersaaneq atorlugu tillinniarfiginninniaraluartutut unnerluussassanngortinneqassasoq, vicepolitikommissær Pavia Kleistip ilanngullugu oqaatigaa.
Ujajaariaraluarnerup saniatigut Nuummi sapaatip-akunnerata naalerani aalakoorpallaartut arfinillit, angerlarsimaffinni eqqissiviilliornerit qulingiluat, taakku ilaat ataaseq meerartaqarfiusoq, politiilli eqqissisaaneratigut annerusumik kinguneqanngitsoq, politiit suliaasa ilagisimavaat. Ataaseq aamma annersaasoqarsimaneranik nalunaarutiginnissimasoq politiit nalunaarusiaraat.
