Nuup Nuussuaani imeq suli bakteeriaqarpallaarpoq

Taamaattumillu Nuussuarmi najugallit qinnuigineqarput imermik imissagunik qalatitseqqaartassasut, imeq naarluutaasinnaallunilu meriaataasinnaammat.

Misissuisut ilimagaat erngup Nuup Nuussuartaanut pilersuisup klorilersuutaata pumpia akornuteqarsimassasoq taamaalillunilu bakteerianititsilluni. Klori bakteerissanut toqoraatiginiarlugu imermut akuliunneqartarpoq, imerlu klor-imik akoqarpallaarunnaarsimagaangat imeq bakteeriaqarnerulersarpoq.

Pumpi pineqartoq maanna taarserneqareerpoq, taamaammallu bakteerissat ikilisimassasorineqaraluarput, taamaakkaluartorli manna tikillugu suli imeq kuutitsivinniit kuutsinneqarsinnaasoq bakteerissanik akoqarpallaartoq oqaatigineqarpoq

Nuussuarmut Nuummullu imermut kuuttumut weekendtip ingerlanerani misissuisoqaqqippoq, inernerali marlunngorpaatinnagu paasinarsisinnaanngitsoq erseqqissaatigineqarpoq, tungaanulli inuit imermik qalatitseqqaartarnissaat kaammattuutigineqarpoq.