Nuup mittarfia tallisussanngorpoq

Nuup mittarfia timmisartunut atlantikukkoorutinut 2009-imiit atorneqarsinnaalissaaq. Tamanna anguneqarpoq Nuup borgmesteriata Attaveqarnermullu Naalakkersuisup ullumi ataatsimeeqatiginneranni. Mittarfiup 1799-ngortinneqarnissaanik isumaqatigiissutigineqarneq Nuup borgmesteria Agnethe Davidsen-ip nuannaarutiginerarpaa.

- ataatsimeeqatigiinnitsinni aammaarlunga Nuup kommunalbestyrelsiata tamarmiusup kissaatigisai saqqumiuteqippakka Agnethe Davidsen oqarpoq. Nuummi mittarfiup tallineqarnissaanut tunngatillugu misisuinerparujussuit qupernernik 2600-it naleqartut, Ilulissanilu mittarfiup tallineqarnissaa Naalakkersuisooqatigiinnit isumaqatiigiissutigineqartoq tunngavilersuutigisimagini borgmesteri oqarpoq.

- Tamakkua tamaasa eqqarsaatigalugit isumaqarama Nuuk qaangiinnarneqarsinnaanngitsoq ataatsimeeqatigiinneq taama inerneqarpoq.

Agnethe Davidsen ilanngullugu oqarpoq Nuup mittarfiata tallineqarnissaa Attaveqarnermut naalakkersuisup upernaaru Inatsisartut ataatsimiilerpata qaqissallugu neriorsuisoq.

Nuummi mittarfiup tallineqarnissaata piginneqatigiinngorluni aningaasalersorneqarsinnaanissaa kommunemillu tiguneqarsinnaanera kommunemi atorfilittanit misissorneqassaaq.

Nuummi mittarfiup 1799 meterinngortinneqarnissaanik isumaqatigiinneq Attaveqarnermut Naalakkersuisup Jens Napaattuup ima nassuiarpaa:

- Naalakkersuisoqatigiit ilassutit isumaqatigiissutaanni siunnerfigineqarpoq Nuup kommunea paaseqatigalugu Nuup kujammut ineriartorsinnaanera mittarfiullu tallineqarnissaa talittarfeqarnerillu eqqartorneqassasut.

Kisianni Nuup kommunalbestyrelsia tamarmiusoq nikeriarumanngilaq.Tamaattumik Nuup kommunea qulaaninngaannik naalakkerlugu inissinnata naaperiarluguli oqaluttuarisaanermi taamatut nikeriartariaqarsimavugut.

Ilulissat mittarfiata tallilerneqarnissaanut suleqatigiissitamut Nuup mittarfiata tallineqarnissaa aamma suliakkiissutigineqassaaq.

Attaveqarnermut Naalakkersuisup Nuummi mittarfiup 1799 meterinik tallineqarnissaanik isumaqatigiinneq siunissamilu 2200 meterinik tallineqarsinnaanera Inatsisartut upernaaru ataatsimiilerpata qaqinniarpaa.

Attaveqarnermullu Naalakkersuisup tallilerinerup aappaagu aallartinneqarnissaa neriutiginerarpaa.

Atuisut mittarfiup tallilerneqarnera kilissagaat Jens Napaattooq erseqqissaavoq. Jens Napaattooq isumaqarpoq atmanna billetsit akitsornannik kinguneqarunanngitsoq, Kangerlussualiaqqaartarneq eqqarsaatigissagaanni.

Nuummi mittarfiup tallissutissaata 800 mio.kronenik naleqarnissaa Nuup kommunini naatsorsuutigineqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat