Nuup kujataani internetti mobilikkullu attavik sapaatiuppat aqqanernut arriillissasoq
Nuup kujataani internetti mobilikkullu internettimut atassuteqarneq sapaatiuppat ullaakkut aqqarnup missaanit arriillissaaq. Tusassip imaani kabelimik iluarsaassinini aallartissavaa, tamannalu sapaatit akunnerinik marlungajannik sivisussuseqassasoq, Tusass nalunaaruteqarpoq.
- Sapaatiuppat ullaakkut aqqarnup eqqaanit Nuup kujataani internettikkut mobilikkullu internettimut attaviit ajorsissapput. Tusass tusagassiuutinut nalunaarummi allappoq.
Immap naqqatigut kabeli aaqqissuuneqarnera
2019-mi immap naqqatigut kabeli aamma aaqqissuunneqarpoq. Taamani pingasut qupisimapput.
Sisiminit kujasissortaani 30 kilumiiterinik ungasissusilimmi januarimi qupivoq.
Qupinerup aappaa sisimiunit 70 kilumiiterinik avannarpasinnerusumit qupivoq.
Qupinerullu pingajussaa 2018-mi kujataani qupilluni.
Kabeli immap naqqani 300-400 itissusilimmiippoq.
Tusassillu oqaatigaa raajarniut peqqutaasimasoq qupinerup ilaanni.
Attaviillu sapaatini akunnerni marlungajanni taamaassapput. Tusassilli iluarsaassineq qanoq sivisutigissanersoq erseqqissumik ilisimanngilaa.
- Anorip, silap ingerlatsinermilu pissutsit qanoq innerat apeqqutaalluinnassaaq, Tusassip iluarsaassineq qaqugu naammassineqarsinnaanissaa imaatigullu kabelimut attaviup ammaqqinneqarnissaa ingerlaavartumik erseqqissaatigisassavaa, Tusass nalunaarpoq.
Imaatigut kabelimik iluarsaassineq unnugumit aallartereertussaagaluarpoq.
Tusass aningaasanik utertitsiniarluni neriorsuisoq
Tusassip oqarnera naapertorlugu atuisartut aningaasanik utertitsiffigineqarsinnaassapput.
Aningaasat utertinneqartussat iluarsaassineq naammassippat naatsorsorneqarumaatut Tusass nalunaaruteqarpoq.
Tusassimi teknikkeqarnermut pisortaq, Jonas Hasselriis oqarpoq:
- Imaatigut kabelip iluarsaanneqarnera pitsaanerpaallunilu sukkanerpaanissaa pillugu sapinngisatsinnik suliaqarpugut, atuisartuttalu paasinninnerat qujassutigaarput. Umiarsuaq maanna ingerlaarpoq, sapaatiuppallu imaatigut iluarsaasilernissarput qilanaaraarput.
AAMMA ATUARUK Imaatigut kabeli iluarsaanneqassasoq: Nunatta kujataani internetti sunnerneqassaaq
- Suliassaq teknikkikkut imaatigut nunamilu suliaqartartutsinnut annertuvoq. Anorili silallu qanoq innerat aqussinnaanngilarput. Sila ajorsissappat suliaqarnerput kinguartissavarput, suliarinerata naammassinissaanut naatsorsuutigisatsinnik nutaamik nalunaaruteqassalluta, Jonas Hasselriis oqarpoq.
Imaani kabeli immap naqqani 300-t 400 meterillu missaannik itissuseqartumiippoq.
Grafik: Tusass
