Nuup kommunia isumaginnittunik amigaateqarpoq

Nuup kommunia isumaginninnermut siunnersortinik ukiup ataatsip ingerlanerinnaani assut amigaateqalersimavoq. Tamanna Nuummi kisimi pinnani aammali nunatta sinnerani ajornartorsiutaavoq. Nuummi kommunaldirektøri Kim Hvistendahl siorna oqarpoq, ajornartorsiut qaangerneqassappat isumaginninnermut suinnersortit akissarsiaat qaffanneqartariaqartut, ullumikkulli pissutsit pitsaanerulersimanngillat. Nuup kommuniani isumaginninnermut siunnersortit atorfii quliupput, arfinillilli ullumikkut amigaatigineqarlutik.

-Siornarniit allaanerulaartutut oqaatigineqarsinnaavoq, kisianni ukiup ingerlanerani iluatsikkiartortutut isikkoqaleraluarpoq, kisianni tassa ajoraluartumik soraartut arlaqarnerisa kingunerisaanik pissutsit siornatulli ileqqinnikuupput.

Nuup Kommuniata meeqqanut inuusuttuaqqanullu immikkoortortaqarfiani pisortaq Nauja Benjaminsen taama oqarpoq. Akissarsiat suli qaffatsinneqanngimmata inunnik isumaginninnermut siunnersortitut ilinniarsimasut suliffinnut allanut akissaatiginnerusunullu nuuttarput.