Nuup kommunia isumaginninnermik siunnersorterpassuarnik amigaateqartoq

Nuup kommuniani inunnik isumaginninnermik siunnersortit ikingaarmata assammi ataatsimi kisinneqarsinnaapput. Siunnersortit quliusussaagaluartut atorfilik ataasiinnaavoq, pingasullu taartaagallarlutik. Tamanna sulisunut ilungersunartoq Nuup kommuniani meeqqanut inuusuttuaqqanullu immikkoortortaqarfimmi pisortap Nauja Benjaminsen-ip oqaatigaa.

-Siunnersortit ingerlarsortorujussuupput ulapittorujussuullutillu. Soraartoqaraangat soraartup sullissarisimasai sulisunut agguataartariaqartarput. Taakku saniatigut suliassanik arlalinnik tigusisariaqartarnerup kinguneranik sulissarparujussuit pigilersarpaat. Taamaalillutik aamma suliniutigineqartut arriinninngortarput, ajoraluartumillu ajornartorsiutit annerusumik iserfigineqarsinnaagaluartut taamaalillutik iserfigineqanngitsoortarlutik. Tassa uani massakkorpiaq ajornartorsiutaasoq aaqqinniarneqartarmat. Aamma pinaveersaartitsinermi suliniutit tunulliutsinneqartarput suliassaqarpallaarneq pissutigalugu, Nauja Benjaminsen oqarpoq.

Inunnik isumaginninnermut siunnersortinik amigaateqarnerujussuaq pissutaalluni inunnik sullissinerup kingunerisartagai sulisut akornannit sullitanillu naammagineqarneq ajorput. Suleqatigisanullumi kommunip avataaniittunut aamma naammaginanngitsuulluni.

-Suleqatigisartakkanut kommunip avataaniittunut aamma naammaginanngilaq amigaateqarnerujussuaq. Pissutigalugu saaffiginnissutigisartakkat atuarfeqarfinninngaanniit assigiinngitsuninngaanniillu suliat piaartumik naammassisassaraluit kinguartiterneqartariaqartarmata. Taamaalilluta tuavisaarutinik pisarpugut, ulluinnarnilu sulianut tunngatillugu tamatsinnut naammaginanngitsumik ulluinnarni atugaqarpugut, Nauja Benjaminsen, Nuup kommuniani meeqqanut inuusuttuaqqanullu immikkoortortaqarfimmi pisortaq oqarpoq.