Nuup Kommuneata suliffeqarfiutai 25-t asbesteqarfiupput

Nuup Kommuneata suliffeqarfiutai 25-t asbesteqarfiusut misissuisoqareernerata kingorna paasineqarpoq. Misissuinerup inerneri Nuup Kommuniata Nalunaarusiaani saqqummiunneqartuni takuneqarsinnaavoq.
Allattoq Oline I. Olsen
novembarip 05-at 2007 10:21

Nuup Kommuneani teknikkimut avatangiisinullu immikkoortortaqarfianiit upernassaq aaliangiisoqarpoq, Nuup Kommuneata suliffeqarfiutai 83-it asbesteqarnersut misissorneqassasut.Taakkunannga 25-it asbesteqarfiusut tassaapput meeraaqqeriviit, meeqqeriviit atuarfiit innarluutillillu sumiiffigisartagaat.

Suliffeqarfiit 1990-p siorna napparneqarsimasut tamarmik misissorneqarput, taakkunanngalu 34-t immikkut asbesteqarnerinik misissugassanik tigusiffigineqarput, 49-illu asbesteqarnissaanik takussutissaqanngimmata tigusiffigineqanngillat.

Asbestemik misissuinermik nalunaarummi siunnersuutigineqarpoq, isersimaartarfiit asbesteqarfiusut Nuup Kommuneanit taarsersorneqassasut. teknikkikkulli atortorissaaruteqarfiit silamiluunniit sananeqaatit asbestimik akoqarpata asserneqassasut.

Nunatsinni asbestimik atuisarneq 1980-imi inerteqqutigineqalerpoq, inerteqqutigineqalinnginnerani asbest, illuliornermi ikuallajasuunngimmat kiffiutissiatut atorneqarluartarnikuuvoq.

Inerteqqutaalerneranut pissutaavoq, asbest puanut nipikkaangami kataqqissinnaannginnami, asbestilu puani katersuutileraangami katsorsarneqarsinnaaneq ajormat, pualluutinngortarlunilu Asbestosemik taaneqartartoq.

Suliffeqarfiit 25-it asbesteqarfiusut qanoq pineqassanersut, Ado Holmimut, Nuup Kommunalbestyrelsiani teknikkeqarnermut avatangiisinullu ataatsimiititaliami siulittaasumut tullersortimut apeqqutigigaluaratsigu akisinnaanngikkallanerarpaa, pingasunngorpalli ataatsimiititaliami apeqquteqaatigissallugu oqaatigaa