Nuup Kommuneata inuusuttut sammisassaqartinniarlugit asiartittarpai
Nuummi Inuusuttut Siuarsartut aqqissugaannik inuusuttut 21-t Nuup eqqaanut Kangerluarsunnguanut asiartinneqarput.
Inuusuttut asiartut aliannaarsaariaannassanngillat tamaviaarulluguli timersortinneqassallutik.
Inuusuttut allatulaaq periarfissinniarlugit taama aaqqissuisoqartoq, Nuuummi Inuusutttut Siuarsartunut aaqqissueqataasoq Sâmo Duelund Schmidt oqarpoq:
- Qajartorlutillu qaqqasiortitaasarput, sermersuarmilu pisutsitsineq aamma ingerlanneqartarluni, Sâmo Duelund Schmidt oqarpoq, nangillunilu:
- Inuusuttut susassaaleqitikkusunnagit asiartinniartarpagut, asuli maani illoqarfimmiitsinnagit.
Asiartinneqartut qulit 18-illu akornanni ukioqarput. Peqataasut ilaata Anori Geisler Chemnitzip siornatigut peqataasareersup, asiarfimmik ukioq manna innaallagiaqalersimanera nuannaarutigeqaa:
- Maannakkut atortuginneruvoq, kingullermik innaallagiaqanngikkaluarami, maannakkulli innaallagianissimalluni, Anori Geisler Chemnitz oqarpoq.
Illoqarfiit allat assingusumik aaqqissuussinissamut Sâmo Duelund Schmidt-ip kaammattorpai, aaqqissuussineq inuusuttunut iluaqutaaginnassammat:
- Inuusuttunut tamanut iluaqutaagami, taavalu inuusuttut nammineq piumassutsiminnik sulerusulertaramik. Taamaattumik kommuninut allanut kajumissaarutigisinnaavara, Sâmo Duelund Scmidt oqarpoq.
Asiartitsineq inummut ataatsimut 300 koruuneqarpoq, kommunimillu akilerneqartarluni.