Nuup Kommunea ikiortissarsiorpoq
Meeqqanut kinguaassiuutitigut atorlunneqarsimasunut kingullernut marlunnut paasiniaanerit piaartumik aallartinnissaat eqqarsaatigalugu, Nuup Kommuniata Namminersornerullutik Oqartussat ikiortiserisimavaat.
Meeqqat ikkatigineqarsimasut 40-t 50-illu akornanniittut ilaqutaallu kommunip attaveqarfigereersimavai, atornerluinerli qanoq annertutigisimanersoq oqartussaasunit suli ilisimaneqanngilaq.
- Tarnip pissusiinik ilisimasalimmit ikiorneqarnissarput eqqarsaatigalugu, suliniullu aallartinniagarput ataqatigiissaarniassagatsigu Namminersornerullutik Oqartussat ikiortiseraavut, Nuup Kommuniani inunnik isumaginninnermut pisortaq, Vibeke Møller Jensen, nutaarsiassaqartitsivimmut Ritzauimut oqarpoq.
Tarnip pissusiinik ilisimasalimmit ikiorserneqartarneq Nuup Kommuniani maannakkorpiaq ajornakusoortorujussuuvoq, Nuup illoqarfiani piffissami kingullermi imminortorpassuit pissutigalugit immikkut ilisimasallit suliassaqaqimmata.
Kinguaassiutitigut atornerluisimanerit pillugit angajoqqaat siullermik ataatsimeeqatigineqarput, tarnip pissusaanik ilisimasalimmit oqaloqateqarnissaat neqeroorutigineqarluni, aamma meeqqat pineqartut atuarfigisaanni ilinniartitsisut qinnuigineqarput, meeqqat atuartitamik ilaat, pisup ingerlanerani, sakkortuumik arlaatigut qisuariaateqarnersut maluginiaqqullugit. Politiit killisiuinerminni naammasippata ikiorserneqarnissamik kommuni neqerooruteqarsinnaalissaaq.
- Killisiuinerit amerlanerit ingerlatereerpavut, ilimagaarpullu meeqqanit 40-t 50-llu akornanni atornerlunneqarsimasunit tusagassiutini eqqartorneqartunit ikinnerussasut, politiit pisortaat, Bent Heiselberg, nutaarsiassaqartitsivimmut Ritzauimut oqarpoq.
