Nuup Kangerluani umimmaat piniaqqusaanngillat

Nuup Kangerluani tuttunniarnermut aggustip aallaqqaataanit ingerlasussamut atatillugu Nuup Kangerluani umimmaat eqqissisimatitaalluinnarnerat Aalisarnermut Piniarnermut Nunalerinermullu Naalakkersuisoqarfiup nalunaarutigaa.
Assi © : Dan Bach Kristensen
Allattoq Simon Uldum -
juulip 31-at 2015 08:16

Nuup Kangerluani umimmannik misissuineq aallartereerpoq piffissamilu aggersumi ingerlagallassalluni. Tuttunniarnermi umimmaat takuneqartut taamaalillutik piniaqqusaanngillat allatigulluunniit akornusersorneqaqqusaanatik.

Nuup Kangerluani tuttunniarnermi umimmaat takuneqartut Aalisarnermut Piniarnermut Nunalerinermullu Naalakkersuisoqarfimmut (APNN) nalunaarutigineqassapput taamatullu nalunaaruteqarnermi umimmaat qassit sumilu takuneqarnerat ilanngunneqassalluni. Umimmaat taamatut nalunaarutigineqartut umimmanik misissuinermut umimmaallu pillugit pilersaarusiornermut ilanngunneqarumaarput, naalakkersuisoqarfik taama ilisimatitsivoq.

Nuup Kangerluani tuttunniarnermi umimmannik inatsisinik unioqqutitsilluni pisaqartoqarsimaneranik imaluunniit umimmanniartoqarsimaneranik ilisimasaqaraanni paasisaqaraanniluunniit aammattaaq APNN-mut nalunaaruteqartoqassaaq.