Nuup Kangerluani saviminissaqarluarpoq
Tonsit 951 millionit. Imaluunniit illuliarsuit Empire State Buildingip assingisa 2.600-t oqimaaqataat. Saviminissaq taamatut annertutigisoq Isukasiata eqqaani toqqortaavoq London Miningilli ilimagisaaninngarnit 65 procentimik annertunerulluni.
Kisitsisit misissueqqaarnermi nutaami saqqummerput tuluillu aatsitassarsiortitseqatigiiffianni nuannaarutaallutik. Aatsitassarsiortitseqatigiiffiup Isukasiani Nuup kangerluata qinnguani sermip ungasinngisaani saviminissarsiorfiliornissani pilersaarutigaa.
- Misissueqqaarneq teknikkimut tunngasut pilersaarutillu tunniussinnaasaata tamarmiusup nalunaarsornissaanni suliniutini suli ingerlariaqqinneruvoq. Isukasia naleqquttumik inissisimavoq saviminermik nioqquteqarnerup annertusiartornera tamatumalu Kalaallit Nunaanni sinerissamut allamut inissisimanera iluaqutiginiarneqassappat, London Miningip pisortaa Graeme Hossie tusagassiuutinut nalunaarummi taama oqarpoq.
Aatsitassarsiortitseqatigiit suli allanik misissueqqittussaapput Isukasiani saviminissap ilumut taama pitsaatigissusia iluamik qulakkeerumallugu. Misissuinerit taakkua ukiaru naammassineqassasut ilimagineqarpoq.
Saviminissarsiorfik piiaaffigalugu ukiuni 70-80-ini saviminermik piiarneqartussamik imaqartoq aatsitassarsiortitseqatigiit siullermilli missiliuusiorsimapput. Ingerlatsineq 2014-imiit aallartinneqarsinnaassaaq tassanilu sulisut 4-500-t pisariaqartinneqartussaallutik. Taakkua aatsitassarsiorfik ammasoq, saviminissamik suliareqqiisarfik, eqqagassanut toqqorsivik, Qussummi umiarsuarsualivimmut angallassineq kiisalu umiarsuarnut usilersortarfik sullisissavaat.
