Nuup issinnerpaaffini angulluinnangajappaa
Ataasiaannarlunimi issinnerusimavoq, tassa marsip aappaanni 1983-imi 27,3 gradinik issillarmat, ippassigami issinneranit 0,6 gradiinnarnik issinnerusimagami, Danmarkimi silasiorfimmi DMI-mit taama allaaserinnittoqarpoq.
Issinnersua Canadap nalaani naqitsinertuffiusumit aallaaveqarpoq, tassa Canadap avannaatungaaniit silaannaq issittoq kitaata sineriaanut supooriuarmat.
Tunup sineriaa marsimi aamma silarluffiusimaqaaq. Atlantikumimi naqitsiniisaffiit Danmarksstrædikkut ingerlaaraangata silaannaq nillertoq nunatta kujataatungaanut ingerlaalersarpoq, tunullu sineriaa piterallattaartinnerulersarlugu.
Kulusummi sapaatiummat marsip aqqarngani anorsarippoq 15 sekundmeterinik sakkortussuseqarluni anoraasuartarneralu 24 sekundmeterinik sakkortussuseqarlutik, tassa anorersuanngilaaginnarluni.
Kitaani suli issikkallassangatinneqarpoq, naqitsiniisaffiimmi Atlantikumiittut tunup sineriaatigut avannamut illuariartortuartillugit taamaakkallassammat, DMI-p nittartagaani taama allaaserinnittoqarpoq.
Nuummi issinnera kianneralu DMI-mit 1958-imiilli nalunaarsorneqartalerpoq.