Nuup ineriartornera arriisaarunneqarpoq

novembarip 24-at 2004 08:14

Nuup kommunalbestyrelsiata tamarmiulluni isumaqatigiittumik aappaagumut aningaasartuutissani pisarnermit sivisunerusumik piareersareerlugu ippassaq piareerpaa. Nuup mittarfia Naaminersornerullutik Oqartussanit upernaaru pisiarisinnaajumallugu, kommunalbestyrelse 80 millioni kroninik immikkoortitsivoq.

Nuup kommunalbsetyrelsiata aappaagu 725 millioni koruuningajaat nutaanik pilersitsiffiusussaanngingajattut aningaasartuutigissavai, akileraarut ukiuni 13-nini allannguuteqarani taamaaginnarluni 25 procentiuinnassaaq, aningaasallu unginngasuutit ½ procentimik ilallugit 10 procentinngortinneqarput.

Aningaasartuutit inissinniarnerini Namminersornerullutik Oqartussat suli paasiniagassarpassuaqarnerarmata misissugassarpassuaqarmatalu nunatta illoqarfiata pingaarnersaata ineriartortinnissaa kigaallassimaartitinneqartoq borgmester Agnethe Davidsen siumumeersoq isumaqarpoq.

- Ilungersunartua uaniissimavoq siunnerfeqanngitsuusaamik ingerlalernerput, allaanngilagut sattaaserluta ingerlaniarsarisugut.

- Naluarput kommuniitut ineriartornissaatsinnut kissaatigisagut naammassineqassanersut naammassineqassannginnersulluunniit. Aapimik namimilluunniit akineqarsinnaangittuarneq ilungersunartorujussuuvoq.

- Takusinnaavarput aningaasarsiornerput appariartulersoq, ulluinnarnilu inuunitsinnut sunniuteqartussanngussooq

Nuup kommuniata atorfilittai Namminersornerullutik Oqartussat atorfilittaannut tapertaallutik naalaakersuisut qulaajarumasaat qulaajarniassallugit saaffiginnilersaarput, neriuutigalugu upernaamut Nuup mittarfia kommunip pisiarisinnaassagaa:

- Neriuppugut taamatut aalajangertoqassasoq, tassami siunissami aningaasarsiornissatsinnut pingaaruteqartorujussuuvoq. Inuutissarsiutitigut ineriartorneq kommunit akisussaaffigivarput, siuarsaaniaraluarlutalu naalakersuisunit, inatsisartunit, naalakkersuinermilluunniit sulialinnit aporfissaararpassuarnik tuniorarneqartuartilluta ingerlariaqqissinnaanngilagut, ingammik kommuniulluni piareersaareerluni aningaasanillu immikkoortitsisareeraluarluta susinnaannginneq, tamannalu kipiluttunarpoq,

Nuup borgmesteriata Agnethe Davidsenip aamma oqaatigaa sanaartugassani Nuup umiarsualiviata allilerneqarnissaanut pilersaarutit piareerluinnareersut naalakkersuisunut neqeroorutigineqarniartut.