Nuup ilaani imermik qalatsitseqqusineq annertusineqartoq
Nuummi Nuukullammi, Jagtvejimi, Kujallerpaani, Aqqusinersuarmi, Niels Hammekensvejip ilaani aamma Sanavejip ilaani najugaqartunut suliffeqarfinnullu imermik qalatitseqqussut septembarip arfineq-pingajuanneersoq suli atuutiinnarnissaa innersuussutigineqarpoq.
Qalatitsequssut maanna aamma Niels Hammekensvejip ilaani Sanavejillu ilaani najugaqartunut ullumi atuutsinneqalerpoq.
Imermik misissuinermi bakterissat uumasut miluumasut inalugaanneersuusinnaasunik mingutsitsinermik nassaartoqarpoq.
Bakteriallu taakku inunnik napparsimalertitsisinnaapput. Imerli qalaanneqarpat napparsimalissutaassinnaajunnaassallutik. Taamaattumik imermik misissuinerup naammaginartumik inerneqarnissaata tungaanut qalaassinissamik innersuussutip atuutiinnarnissaa Pinngortitamut Avatangiisinullu Naalakkersuisoqarfiup inassutigaa.
