Nuup eqqaani upalungaarsimaniarnermik sungiusalersut
Umiarsuarnilu taakkunani marlunni inuttat issimasullu ikilersimasut ullunik sisamanik sivisussuseqartumi annaanniarneqassapput, kiisalu apornerannut atatillugu avatanngiisinut mingutsitsinermik akiuiniarneq sammineqassalluni.
Qujanartumilli umiarsuit apornerat ilumuunngilaq, Nunatsinnili aatsaat taamak annertutigisumik annaassiniarnermik avatanngiisinillu illersuiniarnermik sunngiusarnerulluni.
Sungiusarneq Grønland LIVEX 2016-imik taaguuteqartoq, illersornissaqarfimmit, upalungaarsimanissamillu aqutsisoqarfimmit, politiinit, Nunatsinnilu oqartussanit 350-init piareersarnermit naammassinissaasa tungaanut maajip 23-ianit juunip tallimaata tungaanut peqataaffigineqassaaq.
Aamma atuaruk Upalungaarsimaniarnermik aasaru sungiusalersut
Sungiusarneq umiarsuit marluk apornerannit aallarnerneqassaaq maajip 28-iani. Ullunilu sisamani kalaallit oqartussaasui, nunatsinni politiit issittumilu sakkutooqarfik issimasunik inuttanillu ikilersimasunik qanimut suleqatigiillutik annaassiniaassapput.
Kalaallit hunnorujut missaat danskillu hunnorujut ”piviusuusaartitatut” sungiusarneq peqataaffigissavaat. Imaappoq inuit taakku ikilersimasutut ajunaarsimasutullu peqataassapput.
LIVEX 2016-ip siunertaraa kalaallit danskillu ajunaarnersuaqarnissaanut upalungaarsimanissaannik piginnaasassaannik nukittorsaanissaq, annertuumik pisoqartillugu pilersaarusiornikkut, ingerlatsinikkut periaasissatigullu pitsanngorsaanissaq.
