Nuup eqqaani ullumi nannuttoqarpoq

Nuup eqqaani Qisuttuup Tunuani ullumi nannuttoqarpoq, nanorlu maanna kalaaliaqqami takuniarneqarsinnaalereerluni. Sermitsiami taama allaaserinnittoqarpoq.
Allattoq Mads Lynge
maajip 17-at 2009 17:06

Piniartoq Apollo Berthelsen nannuppoq, kisimiilluni angallateerarsortilluni ullup qeqqata missaani nanoq aallaallugu pisarigamiuk.

Nanoq sunngiffimmi aallaaniartartunit takuneqarsimavoq, VHF-radiokkullu kingorna kalerrisaarillutik.

Kalerrisaarineq Apollo Berthelsenip tusarsimavaa, siulliullunilu apuussimalluni. Nanoq immamiittoq aallaaneqarpoq.

- Nuannaaqaanga. Nannut toqungasut taamaallaat takunikuuakka, aatsaallu uumasumik takusaqarlunga, Apollo Berthelsen, 53-inik ukiulik, Sermitsiamut oqarpoq.

Qaammat ataaseq qaangiuppoq Nuup eqqaani Ulaajummi aamma nannuttoqarmat. Nanoq marluk missaanni ukiulik taamanikkut pisarineqarpoq.