Nuup eqqaani savimminissamik piiaaffissaq aalajangiiffigineqangajalerpoq

Savimminissamik piiaaffissaq Nuup Kangerluata qinnguani Sermersuup eqqannguani Isukasiani, illoqarfimmut Nuummut eqqaaniittunullu sunniutai annertoorujussuussapput.
Allattoq Jaaku Lyberth
novembarip 20-at 2009 05:22

Savimminissamik piiaaffissaq Nuup avannamut kangiani 150 kilometerinik ungasitsigisumiittoq pillugu suliffeqarfiup London Miningip pilersaarutai pillugit paasissutissat sapaatip akunnerata uumap ingerlanerani sulisartunut sulisitsisunut Namminersorlutik Oqartussanut kommunimullu saqqummiuppai, aviisi sermitsiaq ullumi saqqummersoq taamatut allaaserisaqarpoq.

Savimminissamik piiaaffissap aallartisarneqarnissaata 2012-ip 2013-illu ingerlaneranni pinissaa pilersaarutigineqarpoq, aallartisarnermi inuit 1.000-it 1200-illu missaannik amerlassusseqartut sulinissaat naatsorsuutigineqarluni, savimminissamillu piiaaneq 2014-imi aallartippat inuit 400-init 500-it tikillugit sulisorineqarnissaat pilersaarutaavoq.

Savimminissaq Isukasianiittoq ima annertutigivoq ukiut 80-it tikillugit piiarneqarsinnaalluni, piianermini Nuummi eqqaanilu sulisinnaasunik suliffissaqartitsiumaarluni, piaaffimmilu sulisunik kiffartuussinernik suliassaqartitsiumaarluni.

Savimminissamik piiaasoqalerpat savimminissaq ukiumut fem millioni tonsi piiarneqartarnissaa anguniarneqarpoq.

Piiaaffissami mississueqqaarnerit arlaqartut ingerlanneqassapput, missueqqaarnermilu paasisat aappaagu 2010-ip aallartisimalernerani saqummiunneqarnissaat naatsorsuutigineqarpoq, taamanikkussamullu aatsitassarsioqatigiiffiup London Miningip aalajangissavaa savimminissamik piianissaq piviusorsiortuunersoq.

Aatsitassanut inatsissaq inatsisartuni sapaatip akunnerata tulliani aalajangiiffigineqassaaq, Isukasianilu savimminissamik piiaanissamik akuersisussat tassaapput Namminersorlutik Oqartussat.