Nuup avataani uuliasiortoqalerpoq
Canadamiut uuliasioqatigiiffiat EnCana Nuup avataani imartami immikkoortuni marlunni uuliamik nassaassagaluarpat kalaallinut inuiaqatigiinnut annertuumik periarfissiissasoq, Aatsitassanut Pisortaqarfimmi immikkoortortaqarfimmi ingerlatsisoq Jørn Skov Nielsen oqarpoq.
- Kalaallit Nunaanni inuutissarsiut nutaaq tassalu uuliasiorneq pilersinneqassaaq, pisortanut akileraartarnikkut, uuliamik nunami maani pilersuinikkut minnerunngitsumillu suliffissaqartitsiniarnikkut iluaqusiissaaq. Aatsitassanut Pisortaqarfimmi immikkoortortaqarfimmi ingerlatsisoq Jørn Skov Nielsen taama oqarpoq.
Nunatta kitaani maannamut arfinileriarluni uuliasiortoqarsimavoq, uuliasioqatigiiffik Statoil Nuup avataani ukioq 2000-imi kingullermik uuliasiorpoq iluatsinngitsumik. EnCana sooq iluatsitsissangava ?
- EnCana kitaata imartaani uuliasiornissamik marlunnik akuersissuteqarpoq, nunap sananeqaataa uuliaqarsinnaaneralu paasiniarlugu sajuppillatsitsilluni paasissutissanik arlalissuarnik pissarsisimalereerpoq, nalunaarutigereerpaalu, ukioq 2008-imi qilleraluni uuliasiornissani pilersaarutigalugu. Jørn Skov Nielsen erseqqissaavoq.
EnCanap 2008-imi uuliasiornissaminut atatillugu suleqatissarsiorpoq, uuliasioqataasinnaasumillu ataatsimik marlunnilluunnit suleqateqarusullutik.
EnCanap uuliasiorfiginiagaa, 7.000 kvadratkilometerinik isorartussuseqarpoq, akuersissutip aappaa Atammik-mmik taagorneqarpoq, akuersissullu taanna 2002-mi pissarsiarisimavaat, akuerissutillu aappaa Lady Franklin licencemik taaguuteqartinneqartoq Nuup avataaniippoq Canadamut killeqarfiup eqqannguaniilluni.