Nuup avataa aamma inoqarfeqarpoq
Nuup avataani illoqarfinni allani suliffissaaleqisut amerliartornerisa innuttaasut naligiinnginnerat annertusiartortikkaa, SIKp siulittaasua Jess G. Berthelsen aamma GAp pisortaa Henrik Leth ataatsimut oqaaseqaamminni allapput.
Nuup avataani illoqarfinni allani suliffissaaleqineq annertusiartorpoq. Henrik Leth aamma Jess G. Berthelsen isumaqarput naligiinnginneq taamaasilluni annertusiartortinneqalersoq illoqarfiit naligiinnginnerat malunnarnerulissasoq aarleqqutigalugu. Suliffissaqartitsinissaq aammalu nunatta karsiata imassaaleqisup imassaqarnissaa qulakkeerniarlugu sanaartornermi sulissat illoqarfiit annersaata avataani aallartisartariaqartut SIK aamma GA isumaqarput.
- Kalaallit Nunaata aningaasaqarniarnera taama pisortat ingerlataannut malussajatigitillugu pisariaqarluinnarpoq sanaartornermi suliat sumiiffinni arlalinni aallartinnissaat, Henrik Leth aamma Jess G. Berthelsen GAp nittartagaani taama allapput.
Periarfissatut tikkuarpaat attaveqatigiinnermi, inissiaqarnermi aserfallatsaaliinermilu soorlu atuarfinnik suliaqarnikkut suliffissaqartitsinissaq qulakkeerneqarsinnaasoq. Saniatigut pissarsiassatut tikkuarpaat ilinniarfissaqartitsilernissaq tamanna aamma amigaataammat.