Nuunnissaq tikeraarnerinnanngorpoq
Innarluutillip Danmarkimiit nunatsinnut uterusuttuartup uternissaa sapaatip akunnera ataasiinnanngortorlu Sisimiuni isumaginninnermut ataatsimiisitaliap uternissaa itigartitsissutigaa.
Angut inersimasoq spastikereq 37-nik ukiulik aqagu Sisimiunut tikissaaq, ukiuni kingullerni kissaatigisamisut nuunnissani qilanaareqisani piuviusunngortittussaagaluarlugu. Aqaguli tikinnissaa sivikinnerusumik tikeraarnerinnanngussaaq.
”Sapaatip akunnerinnanngortoq tikinnissaanut nalunaarfigineqarpugut uffa suliassaq ukiut marluk ingerlasoq.
Poortuereersoq containerinut tamaasa poortoreerai.
Tassagooq tappinnga utoqqaat angerlarsimaffiata nutarternera suligooq aalajangiiffigineqannginnamikku sumut atussanersoq,” Susanne Johansen anaanaasoq oqarpoq.
Susanne Johansenip angerlarsimaffia assakaasulinnut innarluutillit issiavigisartagaannut atugassanngorlugu kommunep akiligaanik isaarialerneqareersimagaluapoq.
Kommunelu pisussaaffeqarpoq innarluutilik angerlarsinnaanersoq ukiut tamaasa misissuiffigissallugu.
Isumaginninnermut ataatsimiitsitaliami siulittaasoq Alfred Olsen Siumut, radioaviisimut oqarpoq innarluutilimmut tassunga tunngasoq aatsaat 24 august ataatsimiitsitaliamut anngunneqarsimasoq.
Namminersornerullutillu Oqartussat inissaqartitsinissaq akisussaaffigigaa oqaatigaa. Massakkullu Sisimiuni innarluutilimmut inissaqartitsisoqannginnerarpaa. Utoqqaallu Illuata innarluutilinnut immikkoortortaa pillugu ima oqarpoq.
” Naluara kia taanna oqaatigisimaneraa taamatut kisianni innarluutilinnut inuusuttunut utoqqaat angerlarsimaffiat sanaajunngilaq utoqqarnununa sanaajusoq tamaattumik oqaaseqarsimaneq uanga soorunami nalulluinnarpara”, Alfred Olsen oqarpoq.
Alfred Olsen aamma oqarpoq aalajangiineq Isumaginninnermut naammagittaalliortarfimmut social ankenævnimut ingerlateqqinneqarsinnaasoq.
Innarluutilik aqaguagunnguaq inuuissiussagami nuunneq tunissutisiarissagaluarlugu tikeraarnerinnaq tunissutisiarissavaa
