VIDEO Nuummut timmisartup minnerliornera misissuiffigineqalerpoq

Timmisartoq Dash 8 katillugit arfineq pingasunik ilaasoqarluni Nuummut ippassaq nalunaaqutaq ataasinngulersoq meqqammerluni saarlisoorluni minnerliormat inunnik ajoqusertoqanngikkaluartoq suliaq misissuiffigineqalerpoq.

Allattoq Nûno Isbosethsen

decembarip 30-at 2014 10:34

Nuup silaa unerisimanngeqattaarpoq tamannalu timmisartumut ippassaq ualikkut ajutoortitserujussuangajappoq.

- Mittarfik quasasimanngilaq taamaasillunilu timmisartoq missinnaasimavoq, timmisartulli minnerani paasinarsivoq mittarfik quasattoq. Tassa paasissutissiisoqarneranut sanilliullugu mittarfik quasannerusimaqaaq, taamaasillunilu timmisartoq sisoorsimalluni, Air Greenlandimi angallassinermut aqutsisut pisortaat, Christian Keldsen, KNR-imut oqarpoq.

Nalunaaqutaq 12.40 Dash 8 Nuup mittarfianut minnerluppoq. Tassanilu inuit tallimat ilaasorineqarlutik.

Aamma atuaruk Timmisartoq Nuummi mittarfimmi sisusoorpoq

Pisoq pinartutut isigineqarmat misissuinerit aallartinneqareerput.

- Silaannakkut angallannermut tunngassuteqartut suulluunniit pinartutut isigaagut. Mittarfiup quasassimaneranut paasissutissiisimanerit pillugit Ajutoornerit pillugit ataatsimiititaliaq misissuivoq, taamatullu timmisartumi ilaasut sulisullu tamarmik aamma apersorneqarput, Christian Keldsen oqarpoq.

Timmisartumi ilaasut tallimat ikiorserneqarnissaanut Air Greenlandimit neqeroorfigineqareersimapput.

Aamma atuaruk Nuummi timmisartoq sisummat pissanganartoqarsimanngilaq

Timmisartoq Dash 8 Paamiunut quasappallaaqimmat missinnaasimanngimmat uterluni Nuummut minnerliorpoq.