Nuummut tikerartussarpassuit
Suliniaqatigiiffik Winter Cities nunarsuup affaani avannarlermi ukiuunerani sakkortuumik silaannaqartartumi illoqarfiit attaveqaatigaat. Taakku ukiut tamaasa 20 centimeterimik apisartuussapput agguaqatigiissillugulu qaammammi ukiup nillernerpaaffigisaani kiassiutip 0 gradi ataassimasassavaa.
Ataatsimeersuarneq Winter Cities Nuuk ataatsimeersuartarnerit ukioq allortarlugu pisartut 13-issaraat. Ukiormannalu pingaarnerusumik sammineqartussaq tassaavoq ”Issittumi silap pissusaata allanngoriartornera”. Nuummi borgmesteriusimasup Agnethe Davidseniugaluup 2004-mi aaqqissuisuunissaq aalajangiunneqarmalli silap pissusaata allanngoriartorneranut tunngasuunissaa kissaatigisimavaa. Aalajangiinerup taassuma eqqortuunera alianartumillu ilumuussuseqarnera paasinarsisimavoq, soorlu aamma sammineqartussat allat taamaattut, tassa ”Issittumi meeqqat inuusuttullu inuuniarnikkut atugaat” aamma ”Piujuartitsinissaq tunngavigalugu ineriartortitsineq”.
Ilisimatusartut arlallit Nunatsinneersut Danmarkimeersullu ataatsimeersuarnermi nunarsuup kiatsikkiartorneranut tunngasunik tamatumalu Issittumut sunniutai pillugit paasissutissiissapput, soorluttaaq japanimiu ilisimatusartoq suliffissuarnik ingerlatseriaatsit avatangiisinut akornutaanngitsut pillugit paasissutissiiniartoq.
Ataatsimeersuarnermi Sassuma Arnaa ilisarnaatitut atorneqassaaq, aaqqissuisullu naatsorsuutigaat peqataasut nunanit assigiinngitsunit qulineersut 200-t missaanniissasut.
