Nuuk maanna qulisimammat timmisartut minniapiloortarput. Toqqorsivimmit assi.Assi: KNR

Nuummut Maniitsumullu timmisartuussinissaraluit anorersuarnera peqqutaalluni taamaatittut kinguartittullu

Timmisartunik Nuummut mittoqaqqusaanngikkallarnera peqqutaalluni ilaasut 228-t Kangerlussuarmit ippassaq sisamanngornermi ingerlariaqqinneq ajulerput. Taakku Kangerlussuup timersortarfiani akunnipput.

Ingerlariaqqinneq ajulertorpassuaqaqqippoq-aasiit.

Nuummi anorersuarpoq, tamannalu Air Greenlandimut ilungersuatitsingaatsiarpoq. 

Timmisartunik Nuummut mittoqaqqusaanngikkallarnera peqqutaalluni ilaasut 228-t Kangerlussuarmit ippassaq sisamanngornermi ingerlariaqqinneq ajulerput.

Kangerlussuarmi akunnittarfinni inissat tamarmik inniminnerneqarsimammata ilaasut taakku ilarpaalui timersortarfimmi akunnittut, Air Greenland nalunaarpoq.

- Maniitsoq Nuullu massakkorpiaq unammillernartoqarfiunerpaapput. Tamanna nassuerutigissavarput. Anoraasuasarnera peqqutaalluni Maniitsumut Nuummullu aamma taakkunaniit timmisartuussisinnaanngikkallarpugut, Air Greenlandip tusagassiisartua Inga Dora G. Markussen KNR-imut oqarpoq.

- Timmisartumik Nuummut ullaaq qujanartumik tikittoqarpoq, ippassarlu sisamanngornermi aamma tingisoqarluni.  Kangerlussuarmiilli ingerlariaqqinneq ajulertorpassuaqarmat unnuiffissaqanngilaq. Ingerlariaqqinnerlu ajulertut unnuiffissaqarniassammata tamaani timersortarfik attartortariaqarsimavarput. 

- Ingerlariaqqinneq ajulertut Mittarfeqarfiit suleqatigalugit qipissarsillugillu unnuiffissarsivagut. Massakkorpiarli ulapaarfiuvoq, unnuiffissallu tamavimmik ulikkaaqqammata taamaaliortariaqarsimavugut, Inga Dora G. Markussen oqarpoq.

Ippassarli sisamanngornermi timmisartuussinngitsoornera anorersuarneranik kisimi peqquteqanngilaq. Nuummimi mittarfissualiortoqarnera timmisartuussinngitsoornernut aamma peqqutaaqataavoq. Tamanna eqqumiiginarsinnaavoq. Mittarfissualiortulli Nuummi mittarfiup isumannaallisaanermut killeqarfiani assaanerat peqqutaalluni timmisartuussisinnaasimanatik, Air Greenland nassuiaavoq.

AAMMA ATUARUK Ingerlariaqqinneq ajulertorpassuaqareersorlu: Air Greenland timmisartornissamut billetseerniaqqilertoq

Taamaammat Angallannermut Aqutsisoqarfik Nuummiit Nuummullu timmisartuussinermi anorip saneqqiarnartup sakkortussusaanut immikkut ittumik killisarititaliornikuuvoq. Taakkulu ippassaq sisamanngornermi timmisartuussinissaraluanut aamma killiliisooqataapput. 

 Mittarfissualiortulli assaajunnaareertut, Air Greenland nalunaarpoq. 

Qatsoriartussasoq

Nuummi ullumi tallimanngornerup ingerlanerani qatsoriartussasoq, DMI-p Nuummi silasiorfiani silasiortoq Marielle Fournier oqarpoq.

Nuup mittarfiani ullaaq nalunaaqutaq arfernup missaani anorersuartut sakkortutigisumik anoraasuartarpoq.

Maanna ullorornerani (nal. 10.25, aaqq.) qatsoriartulaalereerpoq. Sekundimut meterit 20-t 25-llu akornannik sakkortussusilimmik anorlerpoq, tassa anorersuartut sakkortutigisumik anoraasuartarpoq. 

- Ullup qeqqata kingornaniit unnuup tungaanut atuuttumik qatsoriartussaaq. Anorlingaatsiarporli, silasiortoq oqarpoq. 

Ippassaq sisamanngornermi ullup qeqqata marlullu akornanni anorsarisseruttornerani sekundimut meterit 30 angullugit anorersuarujussuarpoq. 

Ingerlariaqqinneq ajulertorpassuaqarsimasoq

Ilaasut 1000-t missaat sineriammi sumiiffinnit assigiinngitsunit qaammatip siuliani tassa juulip qiteqqunnerani aamma ingerlariaqqinneq ajulerput.

Taamaammat Air Greenlandip taamanikkut ilaasut ingerlariaqqinneq ajulertut ikiliartorniassammata billetseerniarunnaarallarpoq. Allaallumi ingerlariaqqinneq ajulertut ilaat akunniffissalimmut aamma Nuuliaanneqarput. Coronavirusip tunillaassuunnera aasap siuliini marlunni ajornartoortitsereersorlu nunarput takornariaqarluaqqilerpoq. Nunatsinnilu takornariaqarfiunerpaasartumi Ilulissani akunnittarfinni inissat tamarmik inniminnerneqareerput. Ilaasut Ilulissaniit ingerlariaqqinneq ajulertut akunniffissaqarsimanngillat. Taamaammat taakkua ilarpassui akunniffissalimmut Nuuliaanneqarput.

Juulilli 18-ianni billetseerniaqqilerpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl