Nuummiut piareersimapput

Nuuk takornariartaassuarnut umiarsuarnut ilaasunik ullormi ataatsimi aatsaat taama amerlatigisunik - 2.900-nik - ataasinngorpat tikeraarteqassaaq. Takornariat misigisassaqartinniarlugit Nuuk Tourism piareersaaleruttorpoq. Erinarsoqatigiit, uaajeerneq oqalugiartitsinerlu Katuami pissapput, soorluttaaq allarpassuit pissasut. Nuummi Takornariaqarnermut pisortaq, Flemming Nicolaisen, misigisimavoq Nuummiut tikeraartoqarnissamut piareersimasut.
juulip 03-at 2008 16:12

- Piareersimaffigaavut. Soorlu japanimiut umiarsuaanni ilaasut 1.000-it (Clipper Pacific, aaqq.) tikinnissaannut isumaqatigiissuteqarfigereerpagut Katuami assigiinngitsunik pisoqartillugu, nassuiaavoq.

Katuami ullaap tungaani uaageertoqarlunilu erinarsoqatigiit erinarsussapput.

- Siullermik takutitsiffigineqariarlutik kingornagut ilinniartinneqassapput misiliitinneqassallutillu, Flemming Nicolaisen oqarpoq.

Katuami ualikkut Aqqaluk Lynge oqalugiartinneqassaaq kalaallit kinaassusiat aallaavigalugu oqalugiassalluni.

Katersugaasiviit aamma ataasinngornikkut matoqqasaraluartut tamarmik ammatinneqassapput.

- Takornariat umiarsualivimmiit Nuup qeqqanut Nuutoqqamullu bussinik angallanneqassapput. Allallu aamma pingaartumik Nuup saavani kisaqqasussamut ilaasut (Aurora, amerikamiunik tulunnillu 1.900-nik ilaasoqartoq, aaqq.) illoqarfimmi oqaluttuarfigineqaatigalutik bussinik kaavissunneqassapput, oqarpoq.

Arfernik aamma takornariartitsinissamut angallatit ullaarnaniit piareersimaffiginiaraat, Flemming Nicolaisen ilisimatitsivoq.

Nuutoqqami niuertut sanaluttartullu tammajuitsussanik aamma tuniniaassapput.

Nuummi aasaanerani umiarsuarsuarnik takornariat 15.000-iussapput.

Nuummi niuertut peqatigalugit nunat allamiut aningaasaanik: Tuluit Pund-iinik, Amerikamiut Canadamiullu Dollar-iinik, Europamiut Euro-nik Japanimiullu Yen-iinik tigusinissaq aamma piareersarneqareersoq Flemming Nicolaisenip oqaatigaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq