Nuummiut kollegiani inissaqarneq ajorput

Nuummiut immikkut ajornartorsiorput. taakkuami Namminersorlutik Oqartussat kollegiaataanni inissarsisinnaanngillat, Kommuneqarfik Sermersuup kollegiani initaarnissamut utaqqisunut allattorsimaffiutaanut allatsittariaqartarlutik. Taannalu utaqqinarsinaavoq.

- Initaarnissamut utaqqineq ilinniannermit sivisunerusinnaavoq, taamaammallu nunaqarfimmiut inissaqannginnamik Nuummut ilinniariarneq ajorput, Nuummi Piareersarfiup pisortaa, Susanne Møller, oqarpoq.

Aamma Ilisimatusarfimmi ilinniarnermut ataqatigiissaarisup Hanne Søgaardip kollegiassaaleqineq ilisimaarilluarpaa.

- Ajornartorsiut ukiut tamaasa qangali uteqqiattuarsimavoq. Soorluuna matuminnga suliallit tamangajammik uissuummisinneqartartut oqarlutik, aammaasiit kollegianik aasaq manna amigaateqarpugut, Hanne Søgaard.

Taassuma soorunami ilisimaaraa, oquup ajornartorsiutaaneratigut kollegianik isaterisoqarsimanera peqqutaasunut ilaasoq, kisianni:

- Ilinniartitaanermik pilersaarut malillugu amerlanerujartuinnartut ilinnialinernissaat ilutigalugu ajornartorsiut alliartuinnassasoq amerlanerusullu inissaqartinneqartariaqartut ilisimasimaneqarsinnaagaluarpoq, Hanne Søgaard oqarpoq.

Taanna aamma oqarpoq, ajornartorsiut Nuummiunut annerusoq, takkua Namminersorlutik Oqartussat kollegiaataanniissinnaanngimmata:

 - Nuummeersut ajornartorsiornerupput, Kollegianut aqutsisoqarfikkut initaarsinnaanginnamik. Aammami ilinnialersussaq ataaseq taamaatiinarnikuuvoq, suliffimminit inini qimassinnaanginamiuk. Allamimi sumi ineqassagaluarami, Hanne Søgaard aperaaq.

Taassumali amma nuannaarutigaa, pitsaasumik ineriartortoqarmat, tikkuarluguli ilinniartut ajornartorsiormata, naak politikerit piumasaat maliinnaraluarlugu.

- Inissaqartinneqarnani qinnuteqareernermi akineqartaraanni, Ilinniaqqusiuarnermik oqalunnermut naapertuutinngingilaq, Hanne Søgaard oqarpoq.