Nuummiut arlallit Aleqa Kuupillu naalakkersuisooqatigeeqquaat
Partiit arlariit naalakkersuisoqatigiilersinnaanerat imaluunniit amerlanerussuteqaqqalaaginnarluni naalakkersuisunngortitsisoqassanersoq, maanna isumaqatigiinniutigineqaleruttorpoq.
Aleqa Hammond Kuupik V. Kleistillu naalakkersuisooqatigiilersinnaanissaat, Nuummi inuit aqqusinermi naapitavut amerlanerit neriuuteqarput.
- Neriuutiginartorujussuugaluarpoq Siumukkut immaqa IA-lu naalakkersuisunngortitsisinnaanissaat, Karl Ole Petrussen taama oqarpoq nangillunilu; Piffissami qanittumi pisussat eqqarsaatigalugit taakku suliassarpassuit assigiit aallartissimasaat aamma ingerlaqqinnissaat kissaatiginartorujussuugaluarpoq.
Partiit arlariillutik naalakkersuisuutitaqalernissaat amerlasuunit orniginartinneqaraluartoq, Siumut amerlanerussuteqaqqalaaginnarluni naalakkersuisunngortitsinissaa naapitatta ilaata neriuutigaa.
- Neriuppunga Atassullu suleqatigiilerumaartut, pissutigalugu politikkikkut suliniutaat assigiimmata, Astrid Møller taama oqarpoq.
Siumut ukiuni 30-ni kingullerni naalakkersuisuutitaqartarsimanermini taakkunannga IA katillugit ukiuni 16-ini naalakkersuisooqatigisarsimavai, partiillu taakku suleqatigeeqqilersinnaanissaat periarfissaqarataarnissaa ilimanaateqarsinnaavoq.