Nuummiut anginernik meeqqiorput

Nunavummi Nunavimmilu meeqqat Kalaallit meerartaannit mikinerupput pualanerullutillu. Tamanna Peqqinnissaq pillugu ataatsimeersuarnermi nunanit tamalaanit peqataaffigineqartumi Alaskami Fairbanksimi pisumi ilisimatuussutsikkut misissuinermit paasisat aallaavigalugit saqqummiunneqarpoq. Nunavummi aviisi Nunatsiaq News taama allaaserisaqarpoq.
Allattoq Jaaku Lyberth
aggustip 10-at 2012 11:35

Ilisimatuut Canada-mi universitet-ini pingasuni sulisut  Nunavummi Nunavimmi Kalaallit Nunaannilu meeqqat 1.121-it misissuiffigaat. Taakkunannga niviarsiaqqat  566-upput  nukappiaqqallu 554-iullutik pingasuniit tallimat tikillugit ukiullit.

Mississuinerup takutippa kalaallit meerartaat Canada-mi inuit meerartaannut sanilliullugit anginerungaatsiartut - pingaartumillu meeqqat Nuummeersut anginerullutillu oqimaannerusut.

Canada-mili inuit meerartaat pualasoortaqarnerupput.

Nuummi meeqqat pualasuut ikinnerupput, taamaattoq nunatsinni nunaqarfinni meeqqanik pualasoqaaluppoq.

Ilisimatuut isumaqarput, assigiinngitsutit kingornuttakkanik tunngaveqarsinnaasut, aammali inuuniarnermi atukkat pisooqataasut.

Canadap avannarpasissortaani nunaqarfinni inuussutissanik pilersuineq, maanna eqqumaffigineqaqisoq, ilisimatuut immikkut tikkuarpaat. Ajornartorsiutit taamaattut Nunatsinni aamma ilisimaneqarput, nunaqarfimmiut inuussutissanik peqqinnartunik akisuallaanngitsunillu pissarsiniarneq ajornartittaqimmassuk.

Misissuinermi paasineqarpoq, inuussutissanik pilersuineq ajutooraangat, meeqqat annerusumik eqqorneqartartut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq