Nuummiut allagarsiassaat Islandikkoortinneqarput
Allakkat Nunatsinnukartut 5 tonsit Kastrupimi uninngatinneqarput, taamaakkaluartorli Post Greenlandip allakkat Nuummukartut 50 kiilu Air Icelandip inissaqartitsinera naapertorlugu Islandikkoorteriarlugit Nuummut apuutsissinnaasimavai. Akerlianillu allakkat Nuummiit Qallunaat Nunaannukartut 400 kiilut Islandikkoortillugit Qallunaat Nunaannut nassiunneqarsimapput.
Post Greenlandip ilanngullugu ilisimatitsissutigaa allakkat poortukkallu 400 kiilut Qallunaat Nunaanniit Nuummukartut aamma Reykjavikkimut nassiunneqarsimasut, taakkualu Nuummut nassiuteqqinneqarnissaminnut utaqqiinnartut.
- Timmisartortartunik mattussineq attatiinnarneqassappat, nassiussallu annertusiartuinnarpata, taava Post Greenlandimit eqqarsaatigeqqissavarput nassiussat umiarsuakkut ingerlateqqinneqassanersut, Post Greenlandimi nassiussuinermut pisortaq, Lars Holm Hansen oqarpoq. Taassumali erseqqissaatigivaa umiarsuakkut nassiussat ullut 14-it tikillugit mulusinnaasartut.
Post Greenland malillugu Nunatta iluani allakkat nassiussat periarfissaqartillugu umiarsuakkut nassiussorneqarallarput.
