Nuummiut 16.000-issaat inunngorpoq
Katrine Jessen Johannes Poulsenilu sisamanngormat nalunaaqutaq 13.59 ernertaarput 52 cm-inik angitigisoq 3.335 graminillu oqimaassusilik, taamaasillutillu Nuummi innuttaasut 16.000-ssaat meerartaaraat.
Kommuneqarfik Sermersuumi borgmesterip Asii Chemnitz Narupip innutaasunngorlaaq blok 10-mi angajoqqaani aleqanilu najugalik angerlarsimaffigisaani pulaarpaa.
- Meeqqanik inunngortoqaraangat inuunermut kajumissinartaqaaq. Nunatsinni illoqarfiit pingaarnersaani ineriartortumi maannalu innuttaasutsialannik 16.000-inik inoqartumi tamarmillu Nuummi najoruminarsaaqataasunut borgmesteriulluni nuanneqaaq, borgmester Asii Chemnitz Narup kommunip nittartagaani sermersooq.gl-imi taama oqarpoq.
Nuummi innuttaasut 16.000-inngornerat borgmesterip upernarnerulernerani arlaatigut nalliussiniaraa nittartakkami aalla allaaserineqarpoq.