Nuummiumik pilersitsisoq: Ilassaaleqisimaqaanga

Filmimi ilitsersuisup, Otto Rosingip, filmimik pilersitsisoq, Mikisoq Lynge, aningaasanik peqquserluuteqarsimanerarlugu politiinut 2011-mi upernaakkut unnerluuutigaa. 281.776 koruunit Mikisoq Lyngep imminut atorsimavai.

Aamma 499.000 koruunit sumut atorneqarsimanersut takussutissartaqanngillat, Otto Rosingillu oqarnera naapertorlugu, siulersuisuni ilaasortat akuersiteqqaarnagit 489.290 koruuninik Mikisoq Lynge imminut akissarsitissimavoq.

Filmi Nuummioq pillugu pasilliissutit filmit pillugit atuagassiami, Ekkomi, takisoorujussuarmik allaaserineqarput. Unnerluussutit Mikisoq Lyngep allaaserisami tassani oqaaseqarfigai. Nassuerutigaalu aningaasaqarniarneq aqussinnaasimanagu.

- Kukkussuteqaqaanga, aammali eqqarsaatigeriarsiuk, suleqatigisara Otto filmiliorluta aallarteqqammiinnarluta suleqataajunnaarmat, uangalu taamaalillunga kisimiileriataarpunga.

- Taamaalimmat sapinngisara tamaat pitsaanerpaamik suliniarsarivunga. Siornatigummi filmiliorsimanngisaannarpunga. Maannali eqqarsartarpunga filmi ilumut piviusunngortikkipput, Kalaallit Nunaannullu pingaaruteqartoq.

Mikisoq Lyngep nassuerutigaa suliffeqarfiup korti akiliutaa nammineq iluaqutissaminut atortarsimagini, illuatungaatigulli aamma oqarluni, nammineq korti akiliutini suliffeqarfiup aningaasartuutaanut atortarsimagini.

Naatsorsuutini amigaataasut ½ millionit koruunit takussutissartaat tunniutereerini. Aamma 20.000 koruuninik qaammammut akissarsisimanini siulersuisunut ilaasortat akuerereeraat oqarpoq. Tamannali Otto Rosingip, siulersuisunullu ilaasortap, Karin Thorsenip, ilumuunnginnerarpaat.

4,5 millionit koruunit filmimut Nuummiumut atorneqarput. Suliffeqarfik 3900 Pictures ullumikkut akiliisinnaajunnaarqqavoq, 1 millionit koruuninillu akiligassaqarluni.

Filmimilu peqataasut akissarsiassaat aamma tunniunneqarnikuunngillat, taakkulu qaquguluunniit takunavianngilaat.