Nuummit Islandimut Kulusukkoorluni timmisartuussineq ammassaaq

Dash 8 Island-imiit Kulusuk aqqusaarlugu ilaasunik juunip sisamaaniit Nuuliaassisalissaaq. Taama angallassisalernerup saniatigut Dash 8 Nuummiit Kangerlussuarmut Ilulissanullu ullut tamaasa timmisartuussisalissaaq. Aqqutit allat nutaat ilagaat, pingasunngornikkut arfininngornikkullu Nuummiit Rekjavik-mut timmisartuussisalernissat, taama oqarpoq Tuniniaanermi Ussassaarinermilu Arctic Umiaq Line-mi pisortaq Jette Larsen.

-Taanna programmi imaappoq, timmisartoq Dash 8, 35-inik ilaasoqarsinnaasoq attartornikuuvaa Arctic Umiaq Line-p, aasaq naallugu septembarip naajartornerata tungaanut ingerlasartussaassaaq. Sapaatikkut Island-iminngaanniit aallaruni taava nunatsinni Kulusuk Nuuk, Kangerlussuaq, Ilulissat miffigisinnaassavaa. Taakkua illoqarfiit akornani angalasartussaassaaq sapaatip akunnera naangajallugu. Taava sapaatip-akunneranut marloriarluni Islandiliartartussaassaaq.

Tassa aqqut taanna aamma Narsarsuarminngaanniit Island-mut periarfissaalissaaq aammalu illuatungaanut?

-Aap, tassa naluneqanngitsumik Islandimiut Namminersornerullutik Oqartussallu Narsarsuarmut anngallassisoqarsinnaasoq. Taanna timmisartoq atorlugu uagut, Arctic Umiaq Line-iminngaaniit inissat 50-it piumanikuuvagut, aamma akuerinikuuvaat, taakkua immikkut inniminniiffigineqarsinnaasut Arctic Umiaq-mut. Inissat 50-it marlunngornikkut Island-iminngaanniit Narsarsuarmut taavalu tallimanngornikkut Narsarsuarminngaanniit Islandimut, inissat aamma 50-it atorsinnaavagut. Taakku 50-it akornanni 44-ut takornarianut Sarfaq Ittummut attuumassuteqartumut atorneqartussaassapput. Jette Larsen aamma oqarpoq inissat sinneri arfinillit nunaqavissunut atorneqassasut.

Ilanngullugu oqaatigaa angalasut 44-t Danmarkimiit Tysklandimiillu aggerfeqartassasut, taakkulu Narsarsuarmiit Sarfaq Ittummut ilaallutik Ilulissiariarlutik Kangerlussualiaanneqartassasut tassanngaaniillu Island aqqusaarlugu aggerfimminnut timmisartumik utertassallutik.