Nuummioq Sundance Film Festivalimut

Filmi aliikkutassiaq "Nuummioq" nunarsuarmi festivalit annersaannut, Sundance Film Festivalimut, USA-mi naalagaaffimmi Utah-imi, januaarip ulluisa 21-anniit 31-ata tungaanut pisussami, peqataasussanngorlugu toqqarneqarpoq.
Allattoq Louise M. Kleemann
decembarip 03-at 2009 05:13

"Nuummioq" kategorinut akimanernut peqataassaaq - tassa ajugaaniutivinnermi - World Cinema Dramatic Competitionimi - filmit aliikkutassiat nunanit tamaneersut allat 15-it unammeqatigissagamigit. Filmimi ilitsersuisut kikkulluunniit Sundance Film Festivalimi peqataarusuttarput.

- "Nuummioq" ajugaaniutivinnerni ilaassammat uppernarpianngilarluunniit. Ilumut peqataasussanngortoq paasigakku uissuummeqaanga, filmip ilitsersuisua, Otto Rosing, oqarpoq.

Filmit aliikkutassiat tusindtit arlallit unamminernut peqataanissaat neqeroorutigineqartarput, taakkunangalu nassiunneqartunit filmit 200-t Sundance Film Festivalimit toqqarneqartarput. Filmit avataanit festivaleriartunut 50.000-it missaanniittunut takutinneqartarput.

Sundance Film Festivaleqartarneq 1978-imi aallartinneqarpoq, ilaatigut aallartitseqataalluni filmimi isiginnaartitsisartoq Robert Redford - filmilu Redfordip inuttaaffigisaa "Butch Cassidy and the Sundance Kid" atsiunneqarluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq