Nuummioq qallunaat suli takunngilaat
Filmip imarisaanik allaaserinnittoq pingaarneq Torben Bech, aviisimut Berlingske Tidendemut taama oqarpoq. Taannalu aviisip filminik sammisaqartartup Ekkop akisussaalluni aaqqissuisuanit Claus Christensenimit taperserneqarpoq.
- Filmi arlalippassuartigut asseqanngilaq oqaluttuarisaanermullu pingaaruteqarluni. Tamatumalu peqatigisaanik atuagassiami filminik sammisaqartartumi pingaarnerpaami Variety-mi aamma atuagassiani allani pitsaasumik allaaserineqareersorlu, Danmarkimi ataasiarluniluunniit suli takutinneqannginnera uggornarpoq, Claus Christensen Berlingske Tidendemut oqarpoq.
Filmi Nuummioq filmiliani Nunatsinni suliaasuni annerni siullerpaalluni Nunatsinnit aningaasalersugaavoq. 4,7 millionit koruuninik missingersuuteqarluni filmiliaalluni. Sundance Film Festivalimi akissarsisitassatut innersuunneqarluni, Oscarinnattussatut innersuunneqarluni aamma pingaarnerusutut inuttaasoq Lars Rosing filmiliaritillaqqinnerpaatut Palm Springs internationale filmfestivalimi akissarsisinneqarluni.
Nuummiumi ilitsersuisup aamma filmip imarisaanik allaaserinnittup, filmip Danmarkimi suli takutinneqannginneranut akisussaaqataallutik nassuerutigaat.
- Aaqqissuunnera, aningaasaqarniarneq piffissarlu isigalugit filmip naammassineqarsinnaanera tupinnartuliaavoq, siammarterniarneralu uatsinnut oqimaappallaarsimasoq nassuerutigisariaqarparput, filmimi ilitsersuisoq Otto Rosing Berlingske Tidende-mut oqarpoq.
Taamaattorli Berlingske Tidendep saaffiginnereerneratigut Danmarkimi filminik siammarterisartut marluk soqutiginnillutik nalunaarput.
