Nuummioq Oscarinnattussanut innersuunneqanngitsoorpoq

Filmi taanna nunat allat filmiaattut pitsaanerpaatut allat 65-it peqatigalugit Oscarinnattussatut innersuunneqaraluarpoq. Innersuunneqartulli 65-it ippassaq qulingiluaannanngortinneqarmata Nuummioq akuunngitsoorpoq.
januaarip 20-at 2011 06:06

Filmimi peqataasoq, Lars Rosing, angutini inuttaasuni pikkorinnerpaatut Californiami Palm Spring-imi toqqarneqarmat neriulluatoqaleraluaqaaq.

Qallunaalli Susanne Bierip filmiliaa, Hævnen, toqqakkanut qulingiluanut ilaavoq. Filmi taanna Golden Globe-imik nersornaatisilluni sapaatiummat ajugaavoq, taamaammat amerikamiut Oscarinnatsisisartut filmi taanna innersuutissagaat ilimagineqareersimavoq.

Innersuunneqartunut ilaapput svenskit filmiliaat, "Simple Simon" Andreas Ohmanip filmiliaa, mexocomiup Alejandro Gonzales Inarritusip filmiliaa "Biutiful" aamma algeriamiup Rachid Boucharebsip sorsunneq pillugu filmiliaa "Hors la loi", isumaqartoq Inatsisit avaqqullugit.

Oscarinik februaarip ulluisa 27-anni agguaasoqartinnagu filmit taakku qulingiluat Oscarinnattussatut innersuunneqartut toqqaasussatigoorteqqinneqaqqaassapput. Suli sisamat peerneqartussaapput, taamaammat Susanne Bier suli isumalluarpallaartariaqanngilaq.

Filmit sinneruttut tallimat Oscarinnanniuttussat pisortatigoortumik januaarip ulluisa 25-anni saqqummiunneqassapput.