Nunat assigiinngitsut 65-it nunarsuarmi filmiliortarnerup iluani akissarsissutigineqartartut annersaannut peqataapput. Filmit 65-it innersuunneqartut akornanni tallimat Oscarinnanniunnermut februaarip 27-ani ingerlanneqartussamut anngutissapput.
Kalaallit filmiliaat aatsaat siullerpaamik Oscarinnanniunnermut innersuunneqartunut ilaavoq.
- Kalaallit Nunaat sinnerlugu innersuunneqarnerput ataqqinaatitut angisoorujussuartut isigaarput, aatsaammi taama pisoqarmat, filmiliornissamik isumassarsisoq (producer, aaqq.), Mikisoq H. Lynge Ritzau-imut oqarpoq.
Oscarinik ukiup tulliani februaarimi akissarsisitsisoqalerpat filmit ilaat akissarsisitsinermi immikkoortumi taaneqartartumi "Nunanit allanit filmit torrallataanersaat”-ni kalaallinut ilisarnartoqassaaq.
Innersuussutigineqartoq tassaavoq kalaallit isiginnaagassiaat siullerpaaq, ”Nuummioq", Otto Rosingimit Torben Bechimillu ilitsersuisuuffigineqartoq, taannalu nunat allat 65-it akornanniissaaq. Isiginnaagassiami Otto Rosing aamma Julie Berthelsen pingaarnertut inuttaapput.
Nunarput assigalugu Danmark aamma tamatumani ilaassaaq. Susanne Bier-ip ilitsersuisuuffigisaa ”In a better world” qallunaatut taaneqartartoq ”Hævnen” ukioq manna akissarsitinneqartussanut innersuussutigineqarpoq.
Nunat soorlu Etiopia, Norge, Venezuela, Argentina allarpassuillu Nunatta unammillissavai.
Filmit tallimat nunanit allanit filmit torrallataanerpaatut Oscarinnanniuttussat januaarip 25-ani saqqummiunneqassapput.