Nuummioq nersornaatisinngilaq

Filmi Nuummioq naak Amerikami atuagassianit aviisinillu nersualaarneqaraluaqaluni, filmi Sundance Filmfestivalimi nersornaatisinngilaq.
Allattoq Elisa Isaksen
januaarip 31-at 2010 17:00

Filmit assigiinngitsunut tunngasut 24-t nersornaatisipput, taakkununnga ilaallutik filmiliornermik misilittagartuut aamma filmilioqqaartut ilaatigut USA-meersut, Spaniameersut aamma Cambodiameersut - Danmarkimeersorlu ataaseq nersornaatisivoq.

Filmi piviusulersaarut Danmarkimeersoq 'Det røde Kapel', Sundance Filmfestivalimi "nunani allamiut piviusulersaarutaanni pitsaanerpaatut" ajugaatinneqarpoq. Taassuminnga filmilioqataasup Mads Brüggerip nuannaarnini isertuutinngilaa.

- Pilluaammernartorujussuuvoq. Tassa torrak, Mads Brügger Danmarks Radiup nittartagaanut taama oqarpoq. Taassuma quiasaarisartut Simon Juul aamma Jacob Nossel filmimi piviusulersaarummi "Det Røde Kapel"-imi peqatigai.

Filmi piviusulersaarut DR2 TV-mi nangeqattaartumit aallaaveqarpoq, tassani oqaluttuarineqarlutik qallunaat isiginnaartitsisartut piviusuunngitsut, Koreami Avannarlermi kommunistinut kisermaassillutik naalakkersuisuusunut isiginnaartitsisartuusut.

DR2-mi nangeqattaartuliaq Koreami Avannarlermiunik attaveqarnermik ajoqusiisutut isornartorsiorneqarsimavoq.

Filmip "Det Røde Kapel"-ip filmit allat qqanillit ajugaaffigai - unammisitsinerlu aallartimmat filmit nersornaasigassatut piukkussat 782-iugaluarput.