"Nuummioq" filmiliarineqaleruttorpoq

Filmiliortartut danskit kalaallillu Nuummi immiussinissaminnut ulluni makkunani piareersaleruttorput. Filmi ”Nuummioq” Otto Rosingip ilitsersuisuuffigaa, filmiliornermillu misilittagallit Danmarkimeersut peqatigalugit immiussisoqassaaq, perngaammillu filmiliaritittut aamma peqataasussaallutik.
Allattoq Mads Lynge
juulip 05-at 2008 17:12

Ilitsersuisoq Pia Bovin, Danmarkimi ilisimaneqarluartoq, Den Danske Filmskolemilu produktionslederi Annie Worsøe ulluni makkunani aamma Nuummiipput, piareersaajartoqataallutik:

- Otto Rosingi ilitsersuinermik ilinniartippara, isiginnaartitsisartullu pingaaruteqassusaa matumani ersersinniarsaralugu, Pia Bovin oqarpoq, filmimullu inuttassarsiuinermut peqataasimanerarlunilu manuskriptilioqataasimanerarluni.

Annie Worsøe-p, Den Danske Filmskolemeersup, Kalaallit Nunaanni filmiliortoqarnialersoq tusaramiuk, siunnersuiartornissani siunertaralugu Nuummukarpoq.

Taanna ima oqarpoq:

- Filmiliornermik aallarnisaasut malittaralugit pissanganaqaaq, unammillernartortaqarpoq, Nuummiulli tapersersuinerat malunnarpoq, Annie Worsøe oqarpoq, nangipporlu:

- Kalaallit Nunaanni filmiliorniarneq kalaallinut iluaqutaasinnaassaqaaq. Kalaallit Nunaat ilisimaneqarnerulersinnaassaaq, siunissarlu ungasinnerusoq eqqarsaatigalugu filmiliortarnerup Kalaallit Nunaanni ineriartuaartinneqarnissaa neriuutigaara, inuillu saperatik filmiliortalersinnaanissaat neriuutigaara, Annie Worsøe naggasiilluni oqarpoq.

Filmi kalaallit filmiliortartoqatigiivinit 3900 Picturesimit suliarineqartussaavoq, Mikisoq Hove Lyngelu 3900 Picturesimik piginneqataasuulluni. Inuusuttut allallu filmiliortalerusussinnaanissaat taassuma neriuutigaa.

Filmi ”Nuummioq” pillugu Mikisoq Hove Lyngep Frankrigimi Cannesimi nittarsariartoqqammerpaa, isiginnaagassiarlu ”Nuummioq” asanninnermut, ikinngutigiinnermut toqumullu tunngassuteqarluni.