Filmip Europami ippassaq takuteqqaarnerani filmimi ilitsersuisut marluk, Torben Beck aamma Otto Rosing peqataapput. Otto Rosingilu oqaluttuarpoq filmi takorusunneqarsimaqisoq.
- Nuummiup takuteqqaarnerani filmertarfiup silataani inuit iserusuttut amerlaqaat, Otto Rosing oqaluttuarpoq nangillunilu:
- Isiginnaartut nuannaarput, piffissarlu eqqorlugu illartarput ersaattaattarlutillu. Filmi takutinneqareermat scenimut qaqilluta isiginnaartunit apersorneqarpugut. Apeqqutit Kalaallit Nunaannut tunngasut amerlaqaat, aammalu Nuummiumut tunngasut.
Apeqqutit ilagaat isiginnaartitsisut ujammit pinnersaatillu atugaat qanoq isumaqartinneqarnersut. Inuit qaqqani taama ungasitsigisuni ilumut najugaqarnersut. Eqaluit assammik pisarineqarsinnaanersut, tamakku apeqqutigineqartunut ilaasimapput.
Otto Rosingip filmip Nuummiup Europap kangiani filmfestivalit annersaanni takutinneqarnera pingaaruteqarnerarpaa.
- Arlalitsigut iluaqutaassaaq. Siullermik unatut ittumi takutinneqarnera uatsinnut ajugaaneruvoq. Filmerpassuarnik qinigassaqarsimapput, uagullu filmiliarput takutissallugu toqqarsimavaat. Tamanna aamma Europap kangiani filmip soqutigineqalernissaanut aallarnisaataasinnaavoq, Otto Rosing oqarpoq.
- Inuit filmimik eqqartuipput, aviisillu arlallit filmi pillugu allaaserinnipput. Aammalu unammeqataavugut. Ajugaatinneqassaguttalu nunarsuatsinni tuniniaanitsinnut tamanna assut iluaqutaassaaq, Otto Rosing oqaluttuarpoq.
Nuummioq Karlovy Filmfestivavilip 'Forum of Independent Films'-imi peqataavoq, tassani filmit 12-it takutinneqarput, sapaatillu akunnerata naalernerani Nuummioq festivalimi akissarsitinneqassanersoq paasinarsissaaq.
Otto Rosing ilitsersuisoqatinilu Torben Bech, Tjekkiap præsidentiata premierministeriatalu nerersuartitsineranut ippassaq peqataasimapput.
Nuummioq suli filmfestivalinut sisamanut peqataassaaq. Neriuutigaallu Toronto Film Festivalimut peqataasinnaanissartik.