Nuummiit Kapisilinnut ATV-nut aqqusinniornissaq missorneqalersoq
Tamanna missingersuusiornermi aappaagumut isumaqatigiissutigineqartumi takuneqarsinnaasoq, Nuuk Ugeavis allaaserisaqarpoq.
Nuummi mittarfissap piareerneqarnissaanut atatillugu, nunaqarfimmut ATV-nut aqquserniortoqarpat sunik unammilligassaqartoqarsinnaanersoq misissorneqassaaq.
Kommunimi missingersuusiortoqarnerani partiit Siumut minillugu aqqusinniortoqarnissaanut misissuisoqarnissaa tallimanngornermi unnukkut isumaqatigiissutigaat.
Misissuinerup illoqarfiit pingaarnersaannit Nuummit nunaqarfimmut Kapisilinnut 75 kilometerinik isorartutigisumik aqqusinniortoqarsinnaanersoq takussutississavaa.
- Qanoq sanaartorfiusinnaava tassami aqqutissiortoqarsinnaava, taavalu aamma soorunami taamaasiortoqassappat qanoq aningaasatigut uagutsinnut naleqassava, Charlotte Ludvigsen (IA) KNR-imut oqarpoq.
ATV-nut aqqutip avatangiisinut ajoqutaasumik sunniutigisinnaasaasa misissorneqarnissaat borgmesterip aamma pingaartuunerpaa.
- Soorunami taanna pingaaruteqartorujussuuvoq, aamma imatut pilersitsiniarnermi, kiammi taava akisussaaffigissavaa taavalu aqqutaani soorlu isumannaatsumik ingerlasoqartassappat, taavalu aamma avatangiisinut ajoqutaasunik sunniisoqassanngippat taanna paarsinissaq eqqarsaatigalugu, tassa misissorneqartussat aamma taakkua ilagivaat.
ATV-nut aqqut qanoq akeqassanersoq borgmesterip piffissami matumani oqaatigisinnaanngilaa.
- Soorunami kommuni aningaasatigut nammassinnaasaanik tassani aalajangiinissarput pisariaqarpoq, taamaattumik takujumaarparput taakkua inernerit paaseriarutsigit, Kommunqarfik Sermersuumi bogmesteri, Charlotte Ludvigsen oqarpoq.
AAMMA ATUARUK Kapisilinnut aqquserniornerup takornariat amerlisissavai
ATV-nut aqqusinniortoqarnissaanut siunnersuut borgmesteriusimasup, Asii Chemnitz Larsenip (IA) 2016-imi siunnersuutigaa. Siunnersuullu taanna kommunimit siunissami takornariaqarnerulernissaa naatsorsuutigineqalermat ukioq manna qaqinneqaqqippoq.
- Nuumminngaanniit Kapisilinnut pisunnermi taava Kapisilinnut apuunnermi aamma unnuinissamut periarfissat Kapisillit eqqaani aamma takornarianut misigisassarsiorfissat arlaqangaatsiarmata taamaalilluni aamma Kapisilinni takornariaqarnikkut ineriartortitseqqinnissamut ilapittuutaassalluni. Asii Chemnitz Narup ATV-mut aqqut pillugu KNR-imut 2016-imi oqarpoq.
Misissuineq aappaagu naammassineqartussatut pilersaarutigineqarpoq.
