Nuummiit Iqalunnut timmisartuussisoqartarnissaa ujartorpaa
Air Greenlandip Baltimore-imut timmisartukkut angalatitsisarnini unitsimmagu Kenn Harper danskit Nunavummi konsuliat tupaallappallaanngilaq, Nunatsiaq Newsimi tamanna atuarneqarsinnaavoq.
Allattoq Mads Lynge
marsip 31-at 2008 07:41
Kenn Harper apersorneqarnermini nangippoq suli pisariaqarsoralugu Kalaallit Nunaata Canadallu akornanni timmisartuussisarneq, tamannalu anguneqarsinnaasoq timmisartumik minnerusumik atuinikkut, soorlu First Air-ip timmisartuussisarallarami atortarsimasaa naleqquttuusoq. Canadap nunattalu akornanni timmisartuussisarneq takorloorpaa pisassasoq Nuummiit Iqalunnut.
Kenn Harper isumaqarportaaq timmisartuussinermik aallartitseqqinneq soorunami pilerisaarinermut aningaasartuutinik pisariaqartitsiviussasoq, soorluttaaq timmisartumik eqqortumik aamma toqqaaneq pisariaqarluinnassasoq.
Naggasiutigalugu Kenn Harperip oqaatigaa First Airip Air Greenlandillu akornanni oqaloqatigiinnerit tusatsiagallaalersimasut.
