Nuummiit Iqalunnut aqqut misilillugu ammaqqinniarneqarpoq

Kalaallit Nunaata Canadamilu Iqaluit, imaluunniit Frobisher Bayip, akornanni timmisartuussisalernissamut qanoq periarfissaqarnersoq, timmisartuutileqatigiiffiup Air Greenlandip maanna misissorpaa. Tamanna Sermitsiap nittartagaani ullumikkut atuarneqarsinnaavoq, innersuussutigineqarporlu Nunatsiaq Online alakkarneqarsinnaasoq.
juulip 26-at 2009 13:47

Pilersaarut pimoorutorujussuuvarput, Air Greenlandimi tuniniaanermut niuernermullu pisortaq, Christian Keldsen, oqarpoq, tassa Nunatsiaq Online-imi allaaserisat naapertorlugit.

Nunatsinniit Canadamut timmisartuussisoqartalissagaluarpat aningaasaliiffigineqarnissartik Air Greenlandip naatsorsuutiginngilaa, taamaattorli Kalaallit nunaata Nunavullu akornanni timmisartukkut angallassisarnissaq aningaasatigut akilersinnaassanersoq maanna misissorneqarpoq.

Christian Keldsenip oqarnera naapertorlugu, Baltimore-imut tassangaanniillu Nunatsinnut timmisartuussisoqartarallarnermit misilittakkat malillugit taamanikkut angalasoqarpiartarsimanngilaq, angalasummi Amerikamut avannarlermut ingerlaqqikkusuttarsimapput.

- Pappialarsornerinnaq qaammatit arfinillit tikillugit sivisussuseqarsinnaavoq, Air Greenlandimi tuniniaanermut niuernermullu pisortaq, Christian Keldsen, oqarpoq.

Nunatsinniit Iqalunnut aqqummik pilersitsinissap 2010-mi piviusunngorsinnaanissaa Air Greenlandimit neriuutigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq